საგარეო საქმეთა მინისტრის პირველი მოადგილე დავით დონდუა UN ESCAP-ის აღმასრულებელ მდივანს შამშად ახტარს შეხვდა. შეხვედრაზე იმსჯელეს გაეროს ახალი დღის წესრიგისა და მდგრადი განვითარების მიზნების განხორციელებისთვის რეგიონისთვის, მათ შორის, საქართველოსთვის ოფიციალური დახმარებების (Official Development Assistance) გაზრდის შესაძლებლობებზე, ასევე, ტექნიკურ დახმარებებზე და რეგიონალურ პროექტებში საქართველოს აქტიურ მონაწილეობაზე.
საგარეო საქმეთა მინისტრის პირველმა მოადგილემ ქალბატონ შამშად ახტარს გააცნო რეგიონში მიმდინარე და სამომავლოდ დაგეგმილი პროექტები, რომლებშიც შესალებელია საქართველოს, როგორც ტრანზიტული ქვეყნის სრული ჩართულობის უზრუნველყოფა. დავით დონდუამ დაწვრილებით ისაუბრა საქართველოში მიმდინარე პროექტებზე, მათ შორის, აღმოსავლეთისა და დასავლეთის დამაკავშირებელი ჩქაროსნული გზის პროექტზე, ასევე, ამიერ-კავკასიაში ყველაზე ღრმა, წელიწადში 100 მილიონი ტონის მოცულობის გამტარიანობის მქონე “ანაკლიის პორტის” მშენებლობის პროექტზე. მან ასევე მიმოიხილა აზიიდან ევროპის მიმართულებით ტვირთების გადაზიდვისთვის ყველაზე მოკლე ალტერნატიული დერეფნის - ბაქო-თბილისი-ყარსის სარკინიგზო პროექტი.
მხარეებმა ასევე ისაუბრეს ავღანეთის ინიციატივის, აბრეშუმის გზის ერთ-ერთი ალტერნატიული დერეფნის გააქტიურების მნიშვნელობაზე და საქართველოს, აზერბაიჯანის, თურქმენეთისა და ავღანეთის ოთხმხრივი თანამშრომლობის საკითხებზე. ქალბატონი შამშად ახტარი განსაკუთრებით დაინტერესდა აბრეშუმის გზის მულტიმოდალური ბლოკის სარკინიგზო პროექტით, რომლის განხორციელების შემთხვევაში ჩინეთიდან შემომავალი ტვირთები ევროპაში შევა ყაზახეთის, აზერბაიჯანის, საქართველოსა და თურქეთის დამაკავშირებელი სარკინიგზო ხაზის გამოყენებით.
