ერთიანი ნაციონალური მოძრაობის წევრის გიორგი ვაშაძის განცხადებით, „ნაციონალურ მოძრაობას“ როგორც პოლიტიკურ მოძრაობას აქვს პასუხისმგებლობა ყველა დანაშაულზე, რომელიც ჩადენილი იყო მისი მმართველობის პერიოდში, თუმცა, პერსონალურად იყო თუ არა ადამიანი დამნაშავე დღეს ყველა ერთ ქვაბშია მოხარშული.
ენმ-დან ოთხი თანაპარტიელის წასვლის მიზეზებზე ,,for.ge”-სთან საუბრისას იგი აცხადებს, რომ ზურაბ ჯაფარიძე სწორედ იმ პრობლემების მოსაგვარებლად იყო არჩეული აღმასრულებელ მდივნად, რაზეც ახლა თავად საუბრობს.
,,მე არაერთხელ ღიად და საჯაროდ მითქვამს, რომ „ნაციონალურ მოძრაობას“ სჭირდება ახალი ენერგია, განახლება, ახალი მიდგომები და კიდევ ერთხელ გავიმეორებ, რომ ამ მოძრაობაში ვარ მანამ, სანამ მჯერა, რომ ამის რესურსი არის „ნაციონალურ მოძრაობაში“. ვფიქრობ, რომ სწორედ ეს არის ძალა, რომელიც შეძლებს ახლებური მიდგომებით ქვეყნის ამ კრიზისიდან გამოყვანას”, - აღნიშნა დეპუტატმა.
ჟურნალისტის კითხვაზე - თავად ემიჯნება თუ არა იმ სისტემურ დანაშაულს რომელშიც დღეს მისი თანაგუნდელები არიან ბრალდებულები, - ვაშაძე აცხადებს რომ კონკრეტულ დანასაულზე, კონკრეტული ადამიანი უნდა აგებდეს პასუხს.
,,პირადად ვამბობ, რომ ყველა დამნაშავე უნდა იჯდეს ციხეში, ეს ცალსახაა. ვფიქრობ, რომ კონკრეტულმა ადამიანებმა პასუხიც აგეს გარკვეულ დანაშაულებთან დაკავშირებით და დღესაც არიან გამოძიების ქვეშ, მაგრამ სპეკულაციები დანაშაულთან დაკავშირებით, ეს არის მეორე მძიმე დანაშაული. თუ შენ ადამიანს ვერ უმტკიცებ ბრალს, ის ადამიანი არის უდანაშაულო და ამაზე უნდა შევთანხმდეთ.
რაც შეეხება გამიჯვნას, როგორ შეიძლება ვთქვა, რომ თანამონაწილე ვარ ყველა იმ პროცესის - მე არ ვიყავი თანამონაწილე და ამას ვერც ვიტყვი. თუ ვინმემ დანაშაული ჩაიდინა, მე ამაზე პერსონალურ პასუხისმგებლობას ვერ ავიღებ. მოდით, ეს ღიად ვთქვათ, დასამალი არაფერი არ არის, „ნაციონალურ მოძრაობას“ როგორც პოლიტიკურ მოძრაობას, ეს პასუხისმგებლობა აქვს და ამძიმებს კიდევაც ეს პასუხისმგებლობა. მიუხედავად იმისა, დამნაშავე იყავი თუ არა, ყველა ერთ ქვაბშია მოხარშული, მათ შორის ჩვენი მხარდაჭერები. მაგრამ ამის საპასუხოდ ჩვენ იგივე კი არ უნდა გავაკეთოთ, პირიქით, უნდა გადავაბიჯოთ ამ ყველაფერს და უნდა დავიწყოთ სრულიად ახალი განვითარების ეტაპი, როცა ვიტყვით - მეგობრებო, ერთხელ და სამუდამოდ უნდა შევრიგდეთ, ჩვენ არ ვართ იმდენი, რომ ნახევარი საქართველო დაპირისპირებული იყოს მეორე ნახევართან. ჩვენი მთავარი მტერი არის ჩვენგან ჩრდილოეთით. ამას სჭირდება ერთიანობა და ერთიანი მიდგომა. ჩვენი მტერია, გაჭირვება და ეკონომიკური პრობლემები. ამიტომ, ჩემი ინიციატივები იქნება უფრო მკვეთრი და უფრო მკაფიო’’- აღნიშნავს გიორგი ვაშაძე.
