შინაგან საქმეთა მინისტრის ვახტანგ გომელაურის განცხადებით, მისი უწყება სახალხო დამცველის რეკომენდაციებს ყოველთვის ასრულებს. როგორც მან მთავრობის სხდომის შემდეგ ჟურნალისტებთან განაცხადა, სახალხო დამცველისგან პრეტენზიები არასოდეს მოუსმენია.
"ბატონ უჩასთან და მის ინსტიტუტთან ძალიან კარგი ურთიერთობა გვაქვს შს სამინისტროს და ასევე ვიცი, რომ სასჯელაღსრულების სამინისტროსაც. არანაირი პრობლემა არ გვქონია, ან პრეტენზიები, რომ რაიმე მოეწოდებინათ და ჩვენ არ შეგვესრულებინა. მე არ ვიცი ბატონი უჩა რაზე საუბრობს", - განაცხადა ვახტანგ გომალურმა და დასძინა, რომ მისი ინფორმაციით, ადამიანის უფლებების დარღვევის ფაქტები არ დაფიქსირებულა ასევე არც წინასწარი დაკავების საკნებში.
,,პერმანენტულად ხდება მათი შემოწმება, როგორც საქართველოს სახალხო დამცველის, ასევე უცხოელი დამკვირვებლების მხრიდან და ასეთი არც ერთი შემთხვევა არ დაფიქისრებულა იმ 140 შემოწმებიდან, რომელიც ორი წლის განმავლობაში განხორციელდა. ბატონი უჩა რაზე საუბრობს, თუ მოგვაწვდის, ყურადღებას მივაქცევთ და გადავამოწმებთ", - განაცხადა შს მინისტრმა.
სახალხო დამცველს დღეს პარლამენტში უსმენენ. უჩა ნანუაშვილის განცხადებით, სახალხო დამცველის რეკომენდაციებს ყველაზე ნაკლებად ძალოვანი უწყებები ასრულებენ.
