აღსრულების ეროვნული ბიურო მოსახლეობის ინფორმირების კუთხით, აქტიურად განაგრძობს პრევენციული კომუნიკაციის პროგრამას 17-18 წლის მოზარდებთან. მორიგი შეხვედრა ბიუროს თანამშრომლებმა ახალგაზრდა იურისტთა ასოციაციის საკვირაო სკოლაში გამართეს. საუბრის მთავარი თემა შეუსრულებელი ვალდებულებებისა და ვალაუვალობის შესახებ სამოქალაქო ცნობიერების ამაღლება იყო.
საკვირაო სკოლის მოსწავლეებმა მოისმინეს პრეზენტაცია, თუ რა უნდა იცოდნენ ვალის, ფინანსური ვალდებულებებისა და ადმინისტრაციული სახდელის შესახებ; რის უფლება აქვთ თავდებობის შემთხვევაში; როგორ დაიცვან თავი არასასურველი ვალისგან; რა უნდა გაითვალისწინონ იპოთეკის ხელშეკრულების დადებისას; რა ვადებში უნდა გადაიხადონ ადმინისტრაციული ჯარიმა, რათა თავიდან აიცილონ დამატებითი ხარჯები, დრო და ენერგია.
პრეზენტაციის შემდეგ, მოსწავლეებსა და აღსრულების ეროვნული ბიუროს თანამშრომლებს შორის ფინანსურ ვალდებულებებთან დაკავშირებით, კითხვა-პასუხის რეჟიმში, დისკუსია გაიმართა.
ინფორმაციისთვის: პროექტი შვედეთის განვითარებისა და თანამშრომლობის სააგენტოსთან (SIDA) ერთად ხორციელდება. აღსრულების ეროვნულ ბიუროში შექმნილ სამუშაო ჯგუფსა და შვედ ექსპერტებს შორის გამართული შეხვედრების შედეგად გადაწყდა საპილოტე პროექტის ჩაშვება, რომლითაც მოხდება დამამთავრებელი კლასების მოსწავლეების ინფორმირება ვალაუვალობის რისკებსა და მოსალოდნელ შედეგებზე. გარდა ამისა, მოზარდები მიიღებენ ინფორმაციას აღსრულების ეროვნულ ბიუროზე, მის ფუნქციაზე, დემოკრატიულ და თანამედროვე საზოგადოებებში სააღსრულებო სისტემების საჭიროებაზე.
აღსრულების ეროვნული ბიურო მომავალშიც გეგმავს, აქტიურად იმუშაოს სასწავლო დაწესებულებებთან პრევენციული კომუნიკაციის განხორციელების მიმართულებით.
