ვაზიანის სამხედრო აეროდრომის ტერიტორიაზე, ქართულ-ამერიკული ერთობლივი სამხედრო სწავლების „ღირსეული პარტნიორის“ გახსნის ოფიციალურ ცერემონიალზე საქართველოს თავდაცვის მინისტრმა თინა ხიდაშელმა ქართველ და ამერიკელ ჯარისკაცებს სიტყვით მიმართა.
როგორც ხიდაშელმა განაცხადა, მისთვის, როგორც თავდაცვის მინისტრისთვის, დღეს განსაკუთრებული დღეა, რადგან მას, პატივი ერგო, რომ ქვეყანაში ერთ-ერთი ყველაზე მასშტაბური წვრთნისთვის, „ღირსეული პარტნიორისთვის“ ემასპინძლა.
,,დღეს საქართველოსთვის, მისი შეიარაღებული ძალებისთვის, ყოველი ჩვენგანისთვის ყველაზე მნიშვნელოვანი დღეა.
განსაკუთრებული დღეა, ჩემთვის, როგორც თავდაცვის მინისტრისთვის, ვინაიდან მერგო პატივი, ვუმასპინძლო ჩვენს ქვეყანაში ერთ-ერთ ყველაზე მასშტაბურ წვრთნებს, „ღირსეულ პარტნიორს“. მადლობა მინდა გადავუხადო ყველა ჩვენს პარტნიორსა და საქართველოს შეიარაღებული ძალების ყველა წარმომადგენელს, ვინც მონაწილეობა მიიღო „ღირსეული პარტნიორის“ წვრთნების დაგეგმვის, ასევე, წარმატებაში.
მე ამაყი ვარ, რომ საქართველოს შეიარაღებული ძალების ქვედანაყოფები უკვე მრავალი წელია ამერიკელ სამხედროებთან ერთად მხარდამხარ იბრძვიან და მნიშვნელოვანი წვლილი შეაქვთ საერთაშორისო უსაფრთხოების განმტკიცების საქმეში“, - განაცხადა თინა ხიდაშელმა.
ხიდაშელის თქმით, მოხიბულია ღირსეული პარტნიორის - ამერიკის შეერთებული შტატებით, რომელიც უკვე მრავალი წელია განუხრელად უჭერს მხარს დამოუკიდებელ ქართულ სახელმწიფოს, ჰყავდეს განვითარებული, თანამედროვე, ნატოს სტანდარტების შესაბამისი სამხედრო ძალები, რომელსაც შეუძლია საკუთარი მნიშვნელოვანი წვლილი შეიტანოს საერთაშორისო უსაფრთხოების ოპერაციებში.
„ჩვენს განსაკუთრებულ პარტნიორობაზე ომხრივი პროგრამების სიმრავლე და სტატისტიკაც მეტყველებს. იმის აღნიშვნაც საკმარისია, რომ 1200-მეტ ქართველ ჯარისკაცს გავლილი აქვს ინტენსიური მომზადება ამერიკელი ინსტრუქტორების ხელმძღვანელობით.
და დღეს საქართველოს შეიარაღებული ძალები თავსებადია ჩრდილო-ატლანტიკური ალიანსის სამხედრო ძალებთან. სწავლება „ღირსეული პარტნიორი“ კიდევ ერთი წინ გადადგმული ნაბიჯია ჩვენი თანამშრომლობის განმტკიცების პროცესში. ასეთი სწავლება დაეხმარება საქართველოს შეიარაღებულ ძალებს თავდაცვითი შესაძლებლობების განვითარებაში და ამავდროულად, საშუალებას მისცემს, უკეთ მოემზადოს საჭიროების შემთხვევაში ნატო-ს სწრაფი რეაგირების მისიებში მონაწილეობის მისაღებად.
ჩვენი ქვეყნის და მთლიანად რეგიონის წინაშე არსებული გამოწვევების გათვალისწინებით, საქართველოს, დღეს, ისე როგორც არასოდეს ესაჭიროება მტკიცე მხარდაჭერა პარტნიორებისგან, რათა დავიცვათ ჩვენი თავისუფლება და დამოუკიდებლობა. დღევანდელი სწავლება და ქართველ ჯარისკაცებთან ერთად მხარდამხარ მდგომი 300-ზე მეტი ამერიკელი სამხედრო საუკეთესო დემონსტრირებაა თქვენი თანადგომის, პარტნიორობის და გულშემატკივრობის, ჩვენი ქვეყნისა და შეიარაღებული ძალების მიმართ,“ - განაცხადა თინა ხიდაშელმა.
ქართულ-ამერიკული ერთობლივი სწავლება - „ღირსეული პარტნიორი“ დღეს, ვაზიანში ოფიციალურად გაიხსნა. თავდაცვის სამინისტროს ინფორმაციით, წვრთნა საქართველოში პირველად ტარდება და ქართული ასეულის ნატო-ს სწრაფი რეაგირების ძალებთან დაახლოებას, ასევე, ნატო-ს მომავალ ოპერაციებსა და წვრთნებში მონაწილეობისთვის მზადყოფნის ამაღლებას ისახავს მიზნად.
