კიევში ცნობილი ჟურნალისტი და ბლოგერი ოლეს ბუზინა მოკლეს.
ამის შესახებ ინფორმაციას ,,ფეისბუკის” საკუთარ გვერდზე უკრაინის ,,მემარჯვენე სექტორის” თავმჯდომარის მოადგილე ანა დემიდი აქვეყნებს.
,,ეს ესაა, ოლეს ბუზინა მოკლეს... პირდაპირ ეზოში, თავისი სახლის მახლობლად. სროლები ყველას ესმოდა.” - წერს დემიდი.
უკრაინული გამოცემების ცნობით, ინფორმაციას უკრაინის შინაგან საქმეთა სამინისტროც ადასტურებს.
მოწმეების ჩვენების მიხედვით, ბუზინას საკუთარ სახლთან უცნობმა პირებმა ესროლეს, რომლებიც ავტომანქანით მოძრაობდნენ.
შემთხვევის ადგილზე ოპერატიულ-საგამოძიებო სამსახურები მუშაობენ, კიევის ქუჩებში კი დამნაშავეთა ძებნის ოპერაცია მიმდინარეობს.
მკვლელობის ფაქტს სოციალურ ქსელ ,,ფეისბუკში” უკრაინის შინაგან საქმეთა მინისტრის მრჩეველი ანტონ გერაშენკოც ეხმაურება.
,,ცოტა ხნის წინ კიევში, დეგტიარევის ქუჩაზე ,,ფორდ ფოკუსის” მარკის მუქი ლურჯი ავტომობილიდან ცნობილ ჟურნალისტს ოლეს ბუზინას ესროლეს. ოღონდ მანქანას არა უკრაინული, არამედ ლატვიური თუ ბელორუსული ნომრები ჰქონდა.” - წერს გერაშენკო.
ოლეს ბუზინა უკრაინაში ცნობილი ჟურნალისტი, ტელეწამყვანი და მწერალი იყო.
მიმდინარე წლის იანვრიდან ის უკრაინული გაზეთის, ,,სევოდნია”- ს მთავარ რედაქტორად მუშაობდა. ეს პოსტი ბუზინამ მარტის შუა რიცხვებში დატოვა და მიზეზად გამომცემლობაში არსებული ცენზურა და თავისუფლების შეზღუდვა დაასახელა.
უკრაინული გამოცემა ,,ობკომი”- ს მიერ დღეს გამოქვეყნებული ცნობის მიხედვით, კიდევ ერთი ცნობილი უკრაინელი ჟურნალისტი, სერგეი სუხობოკი კიევში ჯერ კიდევ სამი დღის წინ, 13 აპრილის ღამეს მოკლეს.
