აჭარა ტურისტებს კარგავს. აჭარის ტურიზმის დეპარტამენტის ინფორმაციით, 2015 წლის თებერვალში, 2014 წლის თებერვალთან შედარებით, ვიზიტორების რაოდენობა 3,20%-ით შემცირდა, ხოლო რაც შეეხება განთავსების ობიექტთა დატვირთულობის კოეფიციენტს, ის თებერვალში 2,87%-ითაა შემცირებული.
აჭარის ტურიზმის დეპარტამენტში ტურისტების კლების მიზეზად რამდენიმე ფაქტორს ასახელებენ. დეპარტამენტის თავმჯდომარის მოადგილე რაულ აბულაძე ამბობს, რომ ტურისტების კლება საერთო კრიზისმა, იმ ქვეყნებში, საიდანაც რეგიონში ტურისტები ჩამოდიან, ვალუტის გაუფასურებამ და გართულებულმა სავიზო რეჟიმმა განაპირობა.
”საქართველოს მსგავსად კრიზისი სხვა ქვეყნებშიც შეიმჩნევა და შესაბამისად, ისინი თავს იკავებენ მოგზაურობისგან. როგორც ცნობილია, დეპარტამენტში სტატისტიკა სასტუმროების მიერ მოწოდებული ინფორმაციის მიხედვით კეთდება და არა საზღვრის კვეთის მიხედვით.
თუმცა ტურისტული ნაკადის კლებისათვის ერთი მიზეზი არ შეიძლება იყოს, ამისათვის რამდენიმე მიზეზი არსებობს, იგივე ვიზებთან დაკავშირებული პრობლემები. სტატისტიკურ ინფორმაციას თუ გადავხედავთ, კლება ძირითადად არის აზერბაიჯანიდან, ირანიდან, ერაყის, თურქეთიდან და სომხეთიდან. ანუ ეს ნიშნავს იმას, რომ ამ ქვეყნებში ეროვნული ვალუტის კურსის გაუფასურების გამო მოქალაქეები სხვა ქვეყნებში გადაადგილებისგან თავს იკავებენ”, განმარტავს რაულ აბულაძე.
საქართველოსა და ზოგადად რეგიონში მიმდინარე მაკრო-ეკონომიკური პარამეტრების ფონზე, აჭარის ტურიზმის დეპარტამენტის თავმჯდომარის მოადგილეს უჭირს წინმსწრები პროგნოზის გაკეთება, თუ დაახლოებით რა რაოდენობის ტურისტმა მოინახულოს წელს აჭარა.
”ისეთი სიტუაციაა, რომ რთული იქნება რაიმე პროცენტულ ზრდაზე, რომ გავაკეთოთ გათვლები. ჩვენ ჩვენის მხრივ ვცდილობთ, რომ ყველაფერო გავაკეთოთ იმისათვის,. რომ ტურისტები მოვიზიდოთ”, აცხადებს აბულაძე.
რაც შეეხება მიმდინარე წლის ორი თვის მონაცემებს, 2015 წლის იანვარ-თებერვალში სულ აჭარაში 24 ათას 661 ვიზიტორი იმყოფებოდა, 2014 წლის ანალოგიურ პერიოდში კი 24076 ვიზიტორი. შესაბამისად ზრდამ 2.43%-ი შეადგინა. რაც შეეხება დატვირთულობის კოეფიციენტს, აღნიშნული მაჩვენებელი იანვარ-თებერვლის მდგომარეობით 0.71%-თაა გაზრდილი.
