საპარტნიორო ფონდი კორეულ კომპანია K Water-თან, რომელიც ნენსკრას ჰიდროელექტროსადგურის მშენებლობაზეა პასუხისმგებელი, იმპლემენტაციასა და ელექტროენერგიის შესყიდვის ძირითად პირობებზე შეთანხმდა. შეთანხმებას 19 მარტს, თბილისში, საპარტნიორო ფონდის ოფისში მოეწერა ხელი.
საპარტნიორო ფონდი ნენსკრას ჰიდროელექტროსადგურის მშენებლობის სამობილიზაციო სამუშაოებს ზაფხულიდან დაიწყებს. ამჟამად მიმდინარეობს ნენსკრა ჰესის პროექტის სამშენებლო ტენდერი, რომელშიც 7 პრეტენდენტი მონაწილეობს, მათ შორის არიან მსოფლიოში ცნობილი იტალიური, ესპანური, კორეული და თურქული კომპანიები. თითოეული მათგანს ჰიდროელექტროსადგურებისა და ინფრასტრუქტურული ობიექტების მშენებლობაში მრავალწლიანი გამოცდილება გააჩნიათ.
მაისში დასახელდება ჰესის მშენებელი გამარჯვებული კომპანია, რომელიც სამშენებლო სამუშაოების განხორციელებას უზრუნველყოფს. ტენდერში მონაწილე კომპანიები საპარტნიორო ფონდმა K Water, Fichtner, Allen@Overy, IFC, BNP Paribas-თან ერთად შეარჩია.
საპარტნიორო ფონდის აღმასრულებელი დირექტორის ირაკლი კოვზანაძის განცხადებით, ჰესის მშენებლობა 5 წელი გაგრძელდება, თუმცა პირველადი ელექტროენერგიის გამომუშავება მშენებლობის საბოლოო დასრულებამდეც მოხდება.
პროექტის ინვესტორია სამხრეთ კორეული კომპანია K Water, რომელიც საპარტნიორო ფონდთან გაფორმებული ხელშეკრულების თანახმად, პროექტის განხორციელებაზეა პასუხისმგებელი. პროექტში ფონდის მრჩეველია საერთაშორისო საფინანსო კორპორაცია (IFC).
280 მგვტ სიმძლავრის ჰიდროელექტროსადგურს საპარტნიორო ფონდი სვანეთში მდ. ენგურის შენაკადზე აშენებს, რომლის პოტენციური წლიური გამომუშავება 1.2 მლრდ კვტ/სთ. იქნება. ნენსკრა ჰესის პროექტის ჯამური ღირებულება 1 მლრდ. აშშ. დოლარია. პროექტი 2021 წელს დასრულდება.
გარდა ნენსკრას პროექტისა, ენერგეტიკის სექტორში საპარტნიორო ფონდი ასევე მუშაობს 230 მგვტ სიმძლავრის გარდაბნის კომბინირებული ციკლის თბოელექტროსადგურის პროექტზე, რომლის განხორციელების შედეგად ქვეყანა წლიურად დამატებთ 1.8 მილიარდ კილოვატსაათ ელექტროენერგიას მიიღებს. კონტრაქტორი ამ პროექტში არის თურქული კომპანია „ჩალიკ ენერჯი.“ 220 მლნ აშშ დოლარის ღირებულების პროექტს აფინანსებს საპარტნიორო ფონდი შვილობილ კომპანია -„საქართველოს ნავთობის და გაზის კორპორაციასთან“ ერთად და სადგურის ექსპლუატაციაში გაშვებას 2015 წლის ბოლოდან გეგმავს.
აღსანიშნავია, რომ სამხრეთ კორეული სახელმწიფოს წყლის რესურსების კორპორაცია K Water ფლობს 20 მლრდ აშშ დოლარის ღირებულების ჯამურ აქტივებს და მისი წლიური ბრუნვა შეადგენს 2 მლრდ აშშ დოლარს. კორეის გარდა კორპორაცია პროექტებს ახორციელებს სხვადასხვა ქვეყნებში ევროპის და აზიის მასშტაბით.
სააქციო საზოგადოება საპარტნიორო ფონდი საქართველოს მთავრობის მიერ 2011 წელს დაარსდა. სახელმწიფო ფლობს ფონდის 100 %-ს. საპარტნიორო ფონდის აქტივები 5 მილიარდ ლარს აჭარბებს. ფონდი ფლობს „საქართველოს რკინიგზის“, „საქართველოს ნავთობისა და გაზის კორპორაციის“, „საქართველოს სახელმწიფო ელექტროსისტემის“, ელექტროსისტემების კომერციული ოპერატორისა“ და ნაწილობრივ, „თელასის“ აქციებს. ფონდის ერთ-ერთი მთავარი ამოცანაა საინვესტიციო მიმართულებებთან ერთად, ამ სახელმწიფო სტრატეგიული აქციების სწორი კორპორატიული მართვა.
