პარლამენტის თავმჯდომარე, დავით უსუფაშვილი საარჩევნო კანონმდებლობასთან დაკავშირებით სამოქალაქო თანხმობის მემორანდუმზე ხელმომწერ ინტერპარტიული ჯგუფის, საექსპერტო წრეებისა და არასამთავრობო ორგანიზაციათა წარმომადგენლებს შეხვდა.
დავით უსუფაშვილის განაცხადებით, უნდა შეიქმნას ისეთი საარჩევნო სისტემა, რომელიც უზრუნველყოფს თავისუფალი და სამართლიანი არჩევნების ჩატარებას.
სტუმრებმა მადლობა გადაუხადეს პარლამენტის თავმჯდომარეს შეხვედრისთვის და თანამშრომლობისთვის. მათ დავით უსუფაშვილს ხელმოწერილი მემორანდუმი გადასცეს, სადაც მოცემული იყო ის ძირითადი მიმართულებები, რომლის მიხედვითაც, ხელმომწერთა აზრით, საარჩევნო კანონმდებლობაში ცვლილებები უნდა განხორციელდეს და დოკუმენტზე ხელმოწერა სთხოვეს. დავით უსუფაშვილი მემორანდუმში წარმოდგენილ პრინციპებს დაეთანხმა და დოკუმენტს ხელი მოაწერა.
მემორანდუმში ნათქვამია:,,საქართველოში დემოკრატიული, კონკურენტუნარიანი და თანაბარი საარჩევნო გარემოს უზრუნველსაყოფად გადაუდებელ აუცილებლობას წარმოადგენს მოქმედი საარჩევნო სისტემის შეცვლა, რაც შესაბამისი საკონსტიტუციო და სხვა საკანონმდებლო ცვლილებების განხორციელებას საჭიროებს“.
დღეს არსებული საარჩევნო სისტემა ვერ უზრუნველყოფს ამომრჩეველთა ნების პროპორციულად ასახვას მანდატებში, დიდია ამომრჩეველთა დაკარგული ხმების რაოდენობა, არ არის დაცული ერთი ხმის თანაბრობის პრინციპი.
ზემოხსენებული პრობლემის აღმოფხვრის საშუალებად მიგვაჩნია მოქმედი მაჟორიტარული სისტემის შეცვლა.
საჭიროა, რომ უნდა მოხდეს ისეთი საარჩევნო სისტემის მიღება, რომელიც გადაჭრის არსებულ პრობლემებს და უკეთ ასახავს საქართველოს მოქალაქეთა მიერ არჩევნებში გამოვლენილ ნებას.
აღნიშნული მიზნის მისაღწევად საარჩევნო სისტემამ უნდა უზრუნველყოს: 1. ამომრჩეველთა ხმების პროპორციულად ასახვა მანდატებში; 2. ამომრჩეველთა ხმის თანაბარი წონა; 3. ქალთა წარმომადგენლობის გაზრდა; 4. საერთო-ეროვნული და ადგილობრივი წარმომადგენლობა.ყოველივე ზემოაღნიშნულის დროული უზრუნველყოფისთვის მოვითხოვთ, ხელისუფლებამ მიმდინარე წლის მარტის ბოლომდე ფართო საზოგადოებრივ-პოლიტიკური კონსენსუსის საფუძველზე საარჩევნო სისტემის შესაცვლელად, შექმნას მოლაპარაკებების მრავალპარტიული ფორმატი სამოქალაქო საზოგადოებისა და საერთაშორისო ორგანიზაციების ჩართულობით. მრავალპარტიულ, ღია ფორმატში მუშაობის საფუძველზე, არაუგვიანეს 2015 წლის 1 მაისისა, ჩამოყალიბდეს წინადადებათა პაკეტი საკანონმდებლო ცვლილებებისთვის. საკანონმდებლო ცვლილებები საქართველოს პარლამენტმა მიიღოს საერთაშორისო საექსპერტო დასკვნის გათვალისწინებით“.
პარლამენტის თავმჯდომარემ აღნიშნა, რომ საკონსტიტუციო კომისია უფრო ინტენსიური მუშაობის რეჟიმში გადავა და კომისიის ფორმატში განხილული იქნება საკონსტიტუციო ცვლილელები, რომელიც საარჩევნო სისტემასთანაა დაკავშირებული.
მან მემორანდუმზე ხელმომწერებს შესთავაზა, რომ საკუთარი წინადადებები საკონსტიტუციო კომიისის სამუშაო ჯფუფებში წარმოადგინონ.
,,ჩემი პირადი ამოცანაა, რომ საარჩევნო სისტემა მაქსიმალურად მიუახლოვდეს დემოკრატიულ სტანდარტებს “,-განაცხადა დავით უსუფაშვილმა.
