Apple გაყიდვების მხრივ ისევ მსოფლიო ლიდერია. 2014 წლის მეოთხე კვარტლის მონაცემებით, კომპანიამ 74,8 მლნ მოწყობილობა გაყიდა. როგორც ანალიტიკური კომპანია Gartner-ის კვლევებით ირკვევა, ამჯერად Samsung-მა მეორე ადგილზე გადაინაცვლა, რადგანაც კომპანიამ საანგარიშო პერიოდში მხოლოდ 73 მლნ სმარტფონი გაყიდა.
შესაბამისად საანგარიშო პერიოდში Apple-ის საბაზრო წილმა 20,4 %-ი შეადგინა, ხოლო Samsung-ის წილი კი - 19,9 %-ი იყო.
მესამე ადგილს კი კომპანიები Lenovo და Motorola იყოფენ, მათ 24,3 მლნ სმარტფონი გაყიდეს და ბაზრის 6,6 %-ის წილის მფლობელებიც გახდნენ. რაც შეეხება Huawei-ს მან 21 მლნ სმარტფონი გაყიდა და ბაზრის 5,7 %-იან წილსაც დაეპატრონა. Xiaomi-მ კი 2014 წლის მეოთხე კვარტალში მხოლოდ 18,5 მლნ სმარტფონი გაყიდა, რაც იმას ნიშნავს, რომ ის ბაზრის 5,1 %-ს ფლობს.
მიუხედავად ყველაფრისა, 2014 წლის მთლიანი მონაცემებით Samsung-მა პირველობა მოიპოვა, რადგანაც ერთი წლის განმავლობაში მან 307,5 მლნ სმარტფონი გაყიდა, მაშინ როდესაც Apple-მა 191,4 მლნ. შესაბამისად, 2014 წლის მონაცემებით სმარტფონების რეალიზაციაში სამხრეთ კორეულ კომპანიას 24,7 %-იანი წილი გააჩნია, ხოლო კუპერდინულ კომპანიას კი- 15,4 %-ი.
Lenovo-მ და Motorola-მ 2014 წელს ერთდროულად 81,4 მლნ სმარტფონი გაყიდეს, Huawei-მ - 68 მლნ, ხოლო LG-იმ კი 57,6 მლნ.
აღსანიშნავია, რომ 2014 წელს რეკორდული რაოდენობის სმარტფონი გაიყიდა - 1,2 მლრდ-ი ერთეული, აღნიშნული მაჩვენებელი 2014 წლის გარდა არასოდეს არ დაფიქსირებულა. 2014 წელს გაყიდული სმარტფონების რაოდენობა 28,4 %-ით აღემატება 2013 წლის მონაცემებს.
