„საია“-ს თავმჯდომარე ანა ნაცვლიშვილი ,,ჯი-ეიჩ-ენთან” საუბარში აცხადებს, რომ როდესაც არსებობს უფლებადარღვევის ფაქტები სახელმწიფო ვალდებულია, მოხდინოს მისი შესწავლა და შესაბამისი რეაგირება. როგორც პროკურატურის ინიციატივის საპასუხოდ ნაცვლიშვილი აცხადებს მნიშვნელოვანია მოვისმინოთ სახელმწიფოს ხედვა კონკრეტულად როგორ ესახება პროკურატურის ახალი დეპარტამენტის მუშაობის წარმართვა და როლი.
,,ამ ეტაპზე უშუალოდ არ ვიცნობ დეპარტამენტის დებულებას. ასევე ძალიან მნიშვნელოვანია მოვისმიონოთ სახელმწიფოს ხედვა კონკრეტულად როგორ ესახება დეპარტამენტის მუშაობის წარმართვა, რა არის მისი როლი. საია აქტიურად მიადევნებს პროცესს თვალყურს და თუ დაინახავს, საფრთხეებს ადამიანის უფლებების დაცვისა და კანონის უზენაესობის პრინციპებთან დაკავშირებით ამას ღიად იტყვის. თუმცა პრინციპი როცა არსებობს უფლებების დარღვევის შესახებ ფაქტები, ან ამ ფაქტების შესახებ საზოგადოებაში მოსაზრება, ან არსებობენ ადამიანები რომელსაც მიაჩნიათ, რომ მათი უფლები დაირღვა სახელმწიფო ვალდებულია შექმნას მექანიზმი ამ უფლებების აღსადგენად, ეს პრინციპი ჩემთვის არის ცალსახა, ნათელი. თუმცა როგორ მოხდება ეს, რა მექანიზმია ამისთვის ყველაზე ადეკვატური და რა იქნება კონკრეტული შედეგები ცალკე განხილვის საგანია”, _აცხადებს ნაცვლიშვილი.
ამასთან საის თავმჯდომარე მიიჩნევს, რომ მხოლოდ აღნიშნული მექანიზმი ვერ უზრუნველყოფს ყველა კონკრეტული საქმის განიხლვასა და კონკრეტული ადამიანებისთვის მოთხოვნების დაკმაყოფილებას, რადგან საუბარია სერიოზულ თანხებზე.
,,ეს არის ძალიან მნიშვნელოვანია, სენსიტიური და ფაქიზი სამუშაო, მაგრამ ვფიქრობ ძალიან აუცილებელი”, -აცხადებს ,,ჯი-ეიჩ-ენთან” საუბარში ანა ნაცვლიშვილი.
შეგახსენებთ, რომ საქართველოს მთავარ პროკურატურაში შეიქმნა სამართალწარმოების პროცესში ჩადენილი დანაშაულის გამოძიების დეპარტამენტი, რომელიც გამოიძიებს საჯარო მოხელის მიერ ჩადენილ დანაშაულებს, რომლის შედეგადაც მოქალაქეებს ფიზიკური და მატერიალური ზიანი მიადგათ.
კერძოდ, დეპარტამენტი ორიენტირებული იქნება გამოიძიოს 2012 წლის 1 ოქტომბრიდან მთავარ პროკურატურაში შესულ საჩივარ-განცხადებებში მითითებული დანაშაულებრივი ფაქტები. ამათგან პრიორიტეტი მიენიჭება ისეთი დანაშაულების გამოძიებას, როგორიცაა: ქონების უკანონოდ ჩამორთმევისა და ძალადობის ფაქტები, რომელიც მოიცავს ცემა-წამებას, არაადამიანურ და დამამცირებელ მოპყრობას და ყველა იმ დანაშაულს, რომლის ჩადენაშიც საჯარო მოხელე ან მასთან გათანაბრებული პირი იმხილება.
აღნიშნული დეპარტამენტი დაკომპლექტდა დეპარტამენტის უფროსის, დეპარტამენტის უფროსის მოადგილის, 4 პროკურორის, 10 გამომძიებლის და 4 კოორდინატორის შტატით. დეპარტამენტის დაკომპლექტების პროცესში გათვალისწინებული იქნა მაღალი საზოგადოებრივი ინტერესი და კადრების შერჩევა მოხდა განსაკუთრებული სიფრთხილით. დეპარტამენტში გამომძიებლებად და პროკურორებად დაინიშნენ პირები, რომელთა მიმართ მთავარ პროკურატურაში შემოსულ საჩივარ-განცხადებებში სამართლებრივი პრეტენზია არ ფიქსირდება.
გამოსაძიებელი საქმეებისადმი მაღალი საზოგადოებრივი ინტერესიდან გამომდინარე, მიღებული იქნა გადაწყვეტილება დეპარტამენტში დაზარალებულთა კოორდინატორების დანიშვნის შესახებ, რომლებიც საქმის შედეგებით დაინტერესებულ დაზარალებულებს მუდმივ რეჟიმში მიაწვდიან ინფორმაციას გამოძიების მიმდინარეობის შესახებ და გაუწევენ კონსულტაციას სამართლებრივ საკითხებზე.
მთავარი პროკურატურა აღნიშნული დეპარტამენტის საქმიანობის შესახებ პრეზენტაციას 2015 წლის 4 მარტს გამართავს და საზოგადოებას დაწვრილებით მიაწვდის ინფორმაციას დეპარტამენტის ფუნქცია-მოვალეობებისა და გეგმების შესახებ.