კულტურისა და ძეგლთა დაცვის მინისტრი, მიხეილ გიორგაძე საყდრისი-ყაჩაღიანის საქმეზე სააპელაციო სასამართლოს გადაწვეტილებას გამოეხმაურა და აღნიშნა, გადაწყვეტილება საყდრისი-ყაჩაღიანის საბადოს სტატუსს არ ეხება.
"სწორად გავიგოთ, რაზეა საუბარი. ამ გადაწყვეტილებაში სტატუსთან დაკავშირებით საუბარი არ არის. საუბარია წინამდებარე ადმინისტრაციული აქტების გაუქმებაზე, რაც ჩემი ბრძანებით ისედაც გაუქმებულია. ამიტომ წმინდა ტექნიკური დეტალებია, რომელიც საქმის შინაარსობრივ მხარეზე გავლენას არ მოახდენს. ის, რასაც სასამართლო თავისი გადაწყვეტილებით გვავალებს, ჩვენ თვითონვე გვაქვს განხორციელებული", - განაცხადა ჟურნალისტებთან გიორგაძემ.
სააპელაციო სასამართლომ არ დააკმაყოფილა მთავრობისა და კულტურის სამინისტროს საჩივარი და ძალაში დატოვა საქალაქო სასამართლოს გადაწყვეტილება, რომლითაც კულტურის სამინისტროს საყდრისი-ყაჩაღიანისთვის ისტორიული ძეგლის სტატუსის მოხსნის გადაწყვეტილების გადახედვა დაევალა.
შეგახსენებთ, რომ საქალაქო სასამრთლოს გადაწყვეტილებით, ნაწილობრივ გაბათილდა კულტურის მინისტრის 2013 წლის 5 ივლისის ბრძანება საყდრისისთვის უძრავი ძეგლის სტაუტის მოხსნის თაობაზე. უწყებას ასევე დაევალა თავიდან განეხილა სტატუსის საკითხი, კანონმდებლობის შესაბამისად.