უახლოეს პერიოდში, სასესიო კვირის დასრულების შემდეგ, თავდაცვისა და უშიშროების კომიტეტში, თავდაცვის მინისტრ მინდია ჯანელიძეს მოუსმენენ.
მინისტრის პარლამენტში მოწვევის საკითხი, კომიტეტის დღევანდელ სხდომაზე, ფრაქცია ,,თავისუფალი დემოკრატების“ თავმჯდომარემ, ირაკლი ჩიქოვანმა კიდევ ერთხელ დააყენა.
მისი განცხადებით, მინისტრის კომიტეტის სხდომაზე გამოსვლა ღია ფორმატში უნდა ჩატარდეს, რა დროსაც კომიტეტის წევრებს საშუალება მიეცემა, დეტალურად გაეცნონ მინისტრის ხედვებს ქვეყნის თავდაცვისუნარიანობის მიმართულებით, ნატო-საქართველოს ინტენსიური თანამშრომლობის იმპლემენტაციის პაკეტის საკითხებსა და უშუალოდ სამინისტროში მიმდინარე პროცესებს.
კომიტეტის თავმჯდომარის, ირაკლი სესიაშვილის განმარტებით, თავდაცვის მინისტრსა და კომიტეტს შორის შეთანხმება უკვე მიღწეულია და მისი საკანონმდებლო ორგანოში სტუმრობა ობიექტური მიზეზების გამო ამ დრომდე ვერ შედგა.
,,კომიტეტს დიდი სურვილი აქვს თავდაცვის მინისტრს მოუსმინოს და კომუნიკაცია მინდია ჯანელიძესთან დიდი ხანია არსებობს. პრობლემა, რის გამოც მისი მოსვლა პარლამენტში გაჭიანურდა, დროში არათანხვედრა იყო. ჩემი წინადადებაა, სასესიო კვირის დასრულების შემდეგ კონკრეტულ თარიღზე შევთანხმდეთ და მინისტრის მოსმენა ჩავატაროთ“, - განაცხადა ირაკლი სესიაშვილმა.
კომიტეტმა დღესვე მესამე მოსმენით ,,ეროვნული უსაფრთხოების პოლიტიკის დაგეგმვისა და კოორდინაციის წესის შესახებ“ კანონპროექტი და მისგან გამომდინარე კანონპროექტთა პაკეტი, ასევე „საქართველოს დაზვერვის სამსახურის შესახებ“ საქართველოს კანონში ცვლილებების შეტანის თაობაზე და „სამხედრო ვალდებულებისა და სამხედრო სამსახურის შესახებ“ საქართველოს კანონში ცვლილების შეტანის თაობაზე“ კანონპროექტები განიხილა. კანონპროექტებთან დაკავშირებით რედაქციული სახის შენიშვნები არ გამოთქმულა და კომიტეტმა მათ პლენარულ სხდომაზე გატანას მხარი დაუჭირა.
