Wizz Air-ი IPO-თვის ემზადება. უცხოური მედიის ინფორმაციით Wizz Air -ი გეგმავს, რომ 52 263 615 აქციიდან ბირჟაზე 23 360 008 აქცია გაიტანოს. წინასწარი ინფორმაციით, 1 აქციის ღირებულება 11,5 ფუნტი სტერლინგი იქნება.
ამის გარდა, საწესდებო კაპიტალი მოიცავს 48 830503 აქციას ხმის უფლების გარეშე, რომელიც შესაძლოა კონვერტირდეს ჩვეულებრივ აქციებში. იმავდროულად, 1153946 აქცია შესაძლოა გამოიცეს Wizz Air -ის თანამშრომლებისთვის. შესაბამისად ლოუკოსტერის კაპიტალიზაცია, აქციების განთავსების მომენტისათვის 601 მლნ ფუნტი სტერლინგი,ანუ 818 მლნ ევრო იქნება.
აღსანიშნავია, რომ Wizz Air ლონდონის ბირჟაზე აქციების განთავსებას ჯერ კიდევ 2014 წელს გეგმავდა, თუმცა საბოლოოდ პროცესი დროებით გადადეს და ეს ავიაციის სფეროში არასტაბილური ვითარებით ახსნეს.
Wizz Air -ის სუფთა მოგება 2015 ფინანსური წლის 6 თვეში (ფინანსური წელი დაიწყო 2014 წლის აპრილში) 44,5%-ით გაიზარდა და 158,1 მლნ ევრო შეადგინა. კომპანიის საერთო შემოსავალი კი 727,3 მლნ ევროთი განისაზღვრა. ირკვევა, რომ Wizz Air -ის ბილეთის საშუალო ფასი, იგულისხმება 2013ც წლის ოქტომბრიდან 2014 წლის სექტემბრამდე, ევროპის დაბალბიუჯეტიან ავიაკომპანიებს შორის ყველაზე დაბალი იყო - 49,6 ევრო.
გარდა ამისა, ამავე პერიოდში ავიაკომპანიამ თითოეული მგზავრისგან დამატებითი მომსახურებისთვის მიიღო საშუალოდ 25,9 ევრო.
თვითმფრინავში სავარძლების დატვირთულობამ 12 თვეში 86,3%-ი შეადგინა, იმავდროულად კომპანიის კუთვნილებაში არსებული თითოეული თვითმფრინავი ექსპლუატაციაში იმყოფებოდა დღეში 12,7 საათის განმავლობაში.
