თბილისის საქალაქო სასამართლო ქვემო ქართლის ყოფილი გუბერნატორის დავით კირკიტაძისთვის აღკვეთის ღონისძიების შეფარდების საკითხზე იმსჯელებს.
პროცესი 13:00 საათზეა ჩანიშნული.
მთავარი პროკურატურა კირკიტაძისთვის აღკვეთის ღონისძიებად პატიმრობის შეფარდებას ითხოვს. თუმცა, ჯერჯერობით, უცნობია, რა შუამდგომლობას დააყენებს სხდომაზე დაცვის მხარე.
თავად ბრალდებული წარდგენილ ბრალს აბსურდულს უწოდებს და პოლიტიკურ დევნაზე საუბრობს.
შეგახსენებთ, რომ გუშინ საგამოძიებო სამსახურმა, სამსახურეობრივი უფლებამოსილების ბოროტად გამოყენების ფაქტზე, სისხლის სამართლის პასუხისგებაში მისცა ქვემო ქართლის ყოფილი რწმუნებულ-გუბერნატორი, დავით კირკიტაძე.
გამოძიებიებამ დაადგინა, რომ 2011-2012 წლებში, დავით კირკიტაძის მითითებით, ქვემო ქართლის გუბერნიის კუთვნილმა სპეც-ტექნიკამ, საქართველოს კანონმდებლობის დარღვევით, უსასყიდლოდ შეასრულა სამუშაოები დავით კირკიტაძის ძმის, ირაკლი კირკიტაძისა და ყოფილი საჯარო მოხელის, გიორგი უდესიანის ერთობლივი კომპანიების, შპს „ავტოჰაუს-რუსთავი2011“-ისა და შპს „ტიტანი 2011“-ის მიერ, თბილისი-რუსთავის გზატკეცილზე ავტობაზრობის მშენებლობის დროს, რითაც სახელწიფოს მიადგა 248 400 ლარის მატერიალური ზიანი.
საგამოძიებო სამსახურის ინფორმაციით, ვინაიდან დავით კირკიტაძე თავს არიდებს საგამოძიებო ორგანოში გამოცხადებას, მას დადგენილება ბრალდების შესახებ წარედგინება დაუსწრებლად და საქართველოს მთავარი პროკურატურა აღმკვეთი ღონისძიების სახით მოითხოვს პატიმრობას, რისი შეფარდების შემთხვევაშიც მის მიმართ გამოცხადდება ძებნა.
საქმეზე გამოძიება გრძელდება საქართველოს სისხლის სამართლის კოდექსის 332-ე მუხლით.
