საქართველოს საპარლამენტო დელეგაცია, დავით უსუფაშვილის ხელმძღვანელობით, დღეს, ოფიციალური ვიზიტით, ხორვატიის რესპუბლიკას ეწვია.
პირველი შეხვედრა პარლამენტის თავმჯდომარემ კოლეგასთან იოსიპ ლეკოსთან გამართა. მხარეებმა ორ ქვეყანას შორის არსებულ ურთიერთობებსა და ამ ურთიერთობების კიდევ უფრო გაღრმავებაზე, ევროპულ და ევროატლანტიკურ სტრუქტურებში საქართველოს ინტეგრაციაზე და ხორვატია-საქართველოს პარლამენტებს შორის კავშირების გამყარებაზე ისაუბრეს.
შეხვედრაზე მხარეები შეეხნენ გეოპოლიტიკურ ვითარებას, უსაფრთხოების საკითხებს და რეგიონულ პრობლემებს. რეგიონული უსაფრთხოების თემის განხილვისას, ყურადღება რუსეთის მიერ საქართველოს ოკუპირებულ ტერიტორიაზე არსებულ მდგომარეობაზე, ასევე, რუსეთსა და ოკუპირებულ აფხაზეთს და სამხრეთ ოსეთს შორის გაფორმებულ ე.წ. „სტრატეგიული პარტნიორობისა და მეკავშირეობის შესახებ“ ხელშეკრულებაზე გამახვილდა. განხილული იქნა უკრაინაში განვითარებული მოვლენებიც.
დავით უსუფაშვილმა აღნიშნა, რომ საქართველოს ოკუპირებული ტერიტორიების დეფაქტო მთავრობებთან რუსეთის მიერ გაფორმებული ე.წ. ხელშეკრულებები „მეკავშირეობისა და სტრატეგიული პარტნიორობის“ შესახებ, წარმოადგენს საქართველოს ტერიტორიების ანექსიის მცდელობას. მისივე განცხადებით, რუსეთის ამბიციები მოიხვეჭოს გავლენა და ტერიტორიები რეგიონში, საფრთხეს წარმოადგენს არა მხოლოდ ამ რეგიონისთვის, არამედ მთელი ევროპისა და მსოფლიოსთვის.
ხორვატიის რესპუბლიკის პარლამენტის თავმჯდომარის განცხადებით, ისინი საქმის კურსში არიან საქართველოს ოკუპირებულ ტერიტორიებზე განვითარებულ პროცესებთან დაკავშირებით და მათი აზრით საქართველოს ტერიტორიული მთლიანობის პრობლემა მშვიდობიანი გზით უნდა გადაწყდეს, რისთვისაც ხორვატია გააგრძელებს ჟენევის მოლაპარაკებების ფორმატის მხარდაჭერას.
საქართველოს ევროპულ და ევროატლანტიკურ მისწრაფებებზე საუბრისას იოსიპ ლეკომ აღნიშნა, რომ ხორვატია მხარს უჭერს საქართველოს როგორც ევროპულ, ასევე ევროატლანტიკურ სივრცეში ინტეგრაციას და მზად არის საკუთარი გამოცდილება სრულად გაუზიაროს.
პარლამენტის თავმჯდომარემ მადლობა გადაუხადა იოსიპ ლეკოს ხორვატიის პარლამენტის მიერ საქართველოს ევროკავშირთან ასოცირების ხელშეკრულების რატიფიცირებისთვის.
შეხვედრის დასრულების შემდეგ ორი ქვეყნის პარლამენტის თავმჯდომარეებმა ერთობლივი პრესკონფერენცია გამართეს.
დავით უსუფაშვილის განცხადებით: ხორვატიის რესპუბლიკის პარლამენტის თავმჯდომარესთან ძალიან პროდუქტიული და საინტერესო შეხვედრა შედგა. -„აღმოვაჩინეთ რომ ყველაფერში თანამოაზრეები ვართ. შევთანხმდით, ორმხრივი თანამშრომლობის გაღრმავებაზე, ერთობლივ მუშაობაზე გლობალური მშვიდობის მისაღწევად და ევროპული სახლის გასაძლიერებლად“.
იოსიპ ლეკომ პრესკონფერენციაზე აღნიშნა, რომ ხორვატია დაინტერესებულია, რომ საქართველოსა და ხორვატიის რესპუბლიკას შორის აქტიური კავშირები დამყარდეს, როგორც პარლამენტების კომიტეტების და აპარატების, ასევე პრეზიდენტების დონეზეც.
