კოალიცია ,,ქართული ოცნების" წევრი თემურ მაისურაძე, ქუთაისში მდებარე პარლამენტის შენობაში კავკასიის რეგიონის მასშტაბის სასაქონლო და საფონდო ბირჟის განთავსების ინიციატივით გამოდის. როგორც კანონმდებელმა პარლამენტის პლენარულ სხდომაზე განაცხადა, ასეთი ტიპის ბირჟის ამოქმედება რეგიონის განვითარებას შეუწყობს ხელს.
"მოდი, მხარი დავუჭიროთ საქართველოს პარლამენტის თბილისში გადატანას. ქუთაისში მდებარე შენობაში კავკასიის რეგიონის მნიშვნელობის სასაქონლო და საფონდო ბირჟა შევქმნათ. შენობა ასეთ საქმიანობას ნამდვილად მოერგება. იქ, სადაც ჩვენ ვსხედვართ, კომპანიების წარმომადგენლები განლაგდებიან. თაღის ქვეშ მუდმივმოქმედი გამოფენა იქნება და მთელს კავკასიაში ყველას ეცოდინება, რომ ღვეზელიდან დაწყებული ფასიანი ქაღალდებით დამთავრებული, აქ შეიძლება მისი შეძენა. ქუთაისში განლაგდებიან საწარმოები და პატარ-პატარა კომპანიები, რომლებიც სასაქონლო-საფონდო ბირჟასთან იქნებიან მიბმული," - განაცხადა მაისურაძემ.
