უკრაინის უშიშროების სამსახურის თავმჯდომარის ვალენტინ ნალივაიჩენკოს მტკიცებით, 2014 წლის თებერვალში რუსეთის პრეზიდენტის თანაშემწე ვლადისლავ სურკოვი იმ უცხოელ სნაიპერებს ხელმძღვანელობდა, რომლებიც მაიდანზე შეკრებილ უკრაინელ მოქალაქეებს ესროდნენ.
ამის შესახებ მან უკრაინულ ტელეარხ 1+1-ის ეთერში ისაუბრა.
მისი თქმით, ეს ინფორმაცია დაკითხვებზე უკრაინის უშიშროების სამსახურის სპეციალური დანიშნულების რაზმის ,,ალფას" წევრებმა გაახმოვანეს.
,,მათ მოგვცეს კონკრეტული მტკიცებულებები უცხოელი სნაიპერების ადგილმდებარეობის შესახებ, რომლებიც მაიდანზე შეკრებილ მომიტინგეებს და შინაგან საქმეთა სამინისტროს თანამშრომლებს დამიზნებით ესროდნენ." - განაცხადა ნალივაიჩენკომ.
მისივე მტკიცებით, უკრაინელ სამართალდამცავებს სნაიპერების უკანონო საქმიანობის შესახებ დოკუმენტური დადასტურება გააჩნიათ.
,,ცნობილია მათი ვინაობა, უკრაინაში შემოსვლა-გასვლის ვადები, მოპოვებულია მათი პასპორტების ასლები და მონაცემები, თუ რომელი ქსელით უკავშირდებოდნენ ერთმანეთს. ასევე, რომელ შენობაში იყვნენ დაბანაკებულები და როგორ ხელმძღვანელობდა მათ პუტინის თანაშემწე ვლადისლავ სურკოვი." - აღნიშნა ნალიავაიჩენკომ.
შეგახსენებთ, რომ 2014 წლის თებერვალ-მარტში კიევის ცენტრში მიმდინარე მასობრივი საპროტესტო აქციებისას 100 -ზე მეტი ადამიანი დაიღუპა.
მასალის გამოყენების პირობები