რუსეთისადმი არცთუ დიდი კეთილგანწყობით გამორჩეული მწითური ქალბატონი სახელმწიფო დეპარტამენტს ტოვებს. ჯენ პსაკი ქერის უწყების პრეს-სპიკერი აღარ იქნება. აპრილიდან ის თეთრ სახლში დაბრუნდება და ობამას ადმინისტრაციაში მაღალ თანამდებობას დაიკავებს. გავრცელებული ინფორმაციით, პსაკის კომუნიკაციების დირექტორად ნიშნავენ.
სახელმწიფო დეპარტამენტის პრეს-სპიკერად მოღვაწეობისას პსაკიმ ჟურნალისტებს თავი ხისტი ანტირუსული განცხადებებით დაამახსოვრა, თუმცა არანაკლებ საინტერესო გამოდგა მის მიერ ნებსით თუ უნებურად დაშვებული შეცდომები და უზუსტობები, რის გამოც ის რუსული მედიისა და სოციალური ქსელების ვარსკვლავი არაერთგზის გახდა.
რამდენიმე ამონარიდი პსაკის ტრადიციული პრესკონფერენციებიდან:
"როგორც იცით, ბუნებრივი აირის ტრანსპორტირება გაზსადენით ხდება დასავლეთ ევროპიდან რუსეთში უკრაინის გავლით. ოჰ, არა, მაპატიეთ, პირიქით..."
"პსაკი: _ყირიმში არჩევნები ჩატარდა უხეში დარღვევებით. გამოვლინდა საარჩევნო კარუსელები, საარჩევნო სიებში შეყვანილნი იყვნენ ბავშვები...
ჟურნალისტი: _უკაცრავად, საარჩევნო კარუსელი რა არის?
პსაკი:_სამწუხაროდ, თვითონაც არ ვიცი. უბრალოდ, ტექსტს ვკითხულობ. ჩემს კოლეგებთან დავაზუსტებ და გეტყვით."
"კოლეგებთან დავაზუსტებ"-ეს ფრაზა პსაკის ერთგვარი სავიზიტო ბარათი იყო, რომელსაც ის ხშირად უხერხული მდგომარეობიდან გამოსასვლელად იყენებდა, თუმცა მისთვის არც თვითკრიტიკა იყო უცხო. ერთ-ერთი პრესკონფერენციის დასრულების შემდეგ, რომელზეც ეგვიპტის ექსპრეზიდენტ ხოსნი მუბარაქისთვის გამოტანილ განაჩენზე პსაკიმ ვრცლად ისაუბრა, სახელმწიფო დეპარტამენტის პრეს-მდივანი საკუთარი განმარტებებით უკმაყოფილო დარჩა და ჩართულ მიკროფონებთან ჩაილაპარაკა: "ეგვიპტის ნაწილი სულელურად გამომივიდა."
პსაკი ხშირად არც კოლეგებზე ხუმრობას ერიდებოდა. მაგალითისთვის, სახელმწიფო მდივნის თანაშემწე ვიქტორია ნულანდზე მან ასეთი რამ თქვა: "ნულანდმა უცენზუროდ ლანძღვა საბჭოთა გემზე ისწავლა. ხშირად ის მაყურებელს მაშინაც კი აცინებდა, როცა ხმას არ იღებდა, მაგალითად, როცა ის კათედრაზე ცალი ფეხსაცმლით ადიოდა, რომელიც ორთოპედიული იყო. ანდა მაშინ, როდესაც რუსი დიპლომატების მიერ ნაჩუქარი "უშანკა" ქუდით კამერების წინ პოზირებდა."
მხიარულობისა და კურიოზების გარეშე არც მის პირად ცხოვრებას ჩაუვლია. ამბობენ, რომ პსაკიმ მომავალი საქმროც კურიოზულ ვითარებაში გაიცნო. როდესაც ამ უკანასკნელმა დემოკრატიული პარტიის პრეს-სამსახურში დარეკა და იკითხა, როგორ მოხვედრილიყო პარტიის მიერ ორგანიზებულ ღონისძიებაზე, პსაკიმ ის სხვა მიმართულებით გაუშვა და დერეფანში წინ და უკან სიარულით დაღალა. ამის შემდეგ მათ ერთმანეთი შეყვარდათ და დღეს უკვე ბავშვს ელოდებიან. ჯენ პსაკი მალე დედა გახდება.
