ოკუპირებული გალის რაიონის ადმინისტრაციის ხელმძღვანელი თემურ ნადარაია დარწმუნებულია, რომ მის დაქვემდებარებაში მყოფი რაიონის უმთავრეს პრობლემებს შორის ერთ-ერთი ადამიანის უფლებათა დაცვის საკითხია.
მისი თქმით, აფხაზეთსა და კერძოდ გალში თუ როგორ გრძნობს თავს ეროვნული უმცირესობა და რამდენად არის მათი უფლებები დაცული, ამაზე ოკუპირებული აფხაზეთის ხელისუფლება და გალის რაიონის ადმინისტრაციაც ბევრს ფიქრობს.
ამის შესახებ ნადარაიამ ჟენევის დისკუსიების თანათავმჯდომარის ანტი ტურუნენისა და ევროკავშირის წარმომადგენლების გალში სტუმრობისას ისაუბრა.
,,პრეზიდენტმა ჩვენ დავალება მოგცა და დღეს აფხაზეთში საკანონმდებლო ცვლილებები მიმდინარეობს, რაც ადამიანის უფლებათა დაცვის მხრივ, როგორც გალის რაიონში, ისე მთლიანად აფხაზეთის ტერიტორიაზე არსებული ვითარების გაუმჯობესებას შეუწყობს ხელს.
ჩვენ გვესმის, რომ თანამედროვე სამყაროში ვცხოვრობთ და ჩვენი სახელმწიფოებრიობის აღიარება იმაზეა დამოკიდებული, თუ როგორ გადავწყვეტთ ადამიანის უფლებათა დაცვის პრობლემებს აფხაზეთში და როგორი დამოკიდებულება გვექნება ჩვენს ტერიტორიაზე მცხოვრები ნაციონალური ჯგუფების მიმართ, ამ შემთხვევაში გალის რაიონში მცხოვრები ქართველების და მეგრელების მიმართ." - განაცხადა ნადარაიამ.
ევროპელი სტუმრების წინაშე გაკეთებული მოხსენებისას მან ოკუპირებული აფხაზეთის ტერიტორიაზე მცხოვრები ქართული მოსახლეობის უფლებების შელახვის ფაქტების უარყო და აღნიშნა, რომ მათ მიერ ქართული და მეგრული ენების დევნის შესახებ გავრცელებული ინფორმაცია სიმართლეს არ შეესაბამება.
,,საუბრები იმაზე, რომ ჩვენ მოსახლეობას ქართულ ენაზე სწავლებას ვუკრძალავთ, სრული სიცრუეა. ჩვენი სახელმწიფო არც ენას და არც ქართულ და მეგრულ კულტურას არ ებრძვის.
სხვა საქმეა ის პროგრამები, რაც ჩვენი სახელმწიფო იდეოლოგიისთვის უცხოა. ასეთ იდეოლოგიებთან ჩვენ, რა თქმა უნდა, ვიბრძოლებთ, რადგან მიგვაჩნია, რომ აფხაზეთი არის შემდგარი სახელწმიფო და აქ ჩვენი კანონები მოქმედებს."- აღნიშნა გალის რაიონის ადმინისტრაციის ხელმძღვანელმა.
თავის მხრივ, ჟენევის დისკუსიების თანათავმჯდომარემ ანტი ტურუნენმა განაცხადა, რომ აფახზური მხარის ასეთი მიდგომა მათვის სავსებით გასაგები და მისაღებია.
,,თქვენ არ ებრძვით ენას და ეს ფაქტი მისასალემებელია. მხარს გიჭერთ იმ საკითხში, რომ ადგილობრივმა ბავშვებმა მშობლიურ ენაზე უნდა ისწავლონ. ჩვენ განათლების სფეროში ექსპერტები არა ვართ, მაგრამ შეგვიძლია გავეცნოთ და შემდეგში უკვე სხვა საერთაშორისო ორგანიზაციების მხრიდან განათლების საკითხში ექსპერტების დონეზე დაგეხმაროთ." - განაცხადა ტურუნენმა.
