,,თავისუფალი დემოკრატების" წევრი ზურაბ აბაშიძე ,,ჯი-ეიჩ-ენთან" საუბარში აცხადებს, რომ ,,ქართულ ოცნება" ნაცვლად იმისა, რომ პრიორიტეტს ანიჭებდეს ქვეყნის წინაშე მდგარი პრობლემების მოგვარებას დაკავებულია იმით თუ ვინ რა თანამდებობას დაიკავებს.
,,ვულოცავ ,,ქართულ ოცნებას" რომ როგორც იქნა რაღაც საკითხზე შეთანხმდნენ და ეს იყო ჩემი ვიცე-სპიკერობიდან გამოწვევა. სხვა უამრავი პრობლემა რომელიც ქვეყნის წინაშე დგას საგარეო, საშინაო პოლიტიკური თვალსაზრისით, ლარი საოცრად უფასურდება, ეს ყველაფერი უფრო უნდა აწუხებდეთ, ამ საკითხებზე აკეთებდნენ აქცენტს და არა იმაზე ვინ რა თანამდებობას დაიკავებს", _აცხადებს აბაშიძე.
კითხვაზე კოალიცია ,,ქართული ოცნებისთვის" უფრო მნიშვნელოვანია თანამდებობა, ვიდრე ქვეყნის წინაშე მდგარი პრობლემები აბაშიძე პასუხობს:
,,რა Yთქმა უნდა, ვიდრე ის პრობლემები რომლებიც ქვეყნის წინაშე დგას, ატყობთ რამეს რომ მის მოგვარებას ცდილობდნენ?-მე ვერ ვამჩნევ, სამწუხაროდ,", -განაცხადა აბაშიძემ ,,ჯი-ეიჩ-ენთან" საუბარში.
საპარლამენტო უმრავლესობამ, მისი წარდგინებით არჩეული პარლამენტის თავმჯდომარის მოადგილე, ზურაბ აბაშიძე თანამდებობიდან გაიწვია.ამის შესახებ პარლამენტის თავმჯდომარემ, დავით უსუფაშვილმა დეპუტატებს პლენარულ სხდომაზე განუცხადა.
,,ჩემს სახელზე პარლამენტში შემოსულია საპარლამენტო უმრავლესობის განცხადება, რომლითაც საპარლამენტო უმრავლესობის ლიდერი გვამცნობს, რომ პარლამენტის რეგლამეტის 113 მუხლის მე-4 პუნქტის საფუძველზე, საპარლამენტო უმრავლესობის წარდგინებით არჩეული პარლამენტის თავმჯდომარის მოადგილე, ზურაბ აბაშიძე გამოწვეულია ამ თანამდებობიდან. მოგეხსენებათ, საქართველოს პარლამენტის რეგლამენტი ვიცე-სპიკერებთან დაკავშირებით ადგენს გარკვეულ პროცედურებს და განსაზღვრავს უფლებამოსილ პირებს. ბატონი ზურაბ აბაშიძე იყო არჩეული უმრავლესობის წარდგინებით. რეგლამენტის 113-ე მუხლის, მე-4 პუნქტის შესაბამისად, წარმდგენ სუბიექტს უფლება აქვს გამოიწვიოს წარდგენილი პირი ამ თანმდებობიდან. ასე რომ, გთხოვთ, პარლამენტმა ეს საკითხი მივიღოთ ცნობად და გაკეთდეს შესაბამისი საოქმო ჩანაწერი. პარლამენტის რეგლამენტი ასეთ შემთხვევაში კენჭისყრას არ ითვალისწინებს. ეს არის უფლება წარმდგენი სუბიექტის", - განაცხადა დავით უსუფაშვილმა.
