უკრაინის პრეზიდენტის აპარატთან არსებული რეფორმების საერთაშორისო საბჭოს თავმჯდომარის და უკრაინის პრეზიდენტის მრჩევლის მიხეილ სააკაშვილის განცხადებით, უკრაინელი ჩინოვნიკების სახელფასო განაკვეთის ზედა ზღვარი კორუფციის არსებობის საშუალებას იძლევა.
ამის შესახებ მან ჟურნალისტებთან პრეს-კონფერენციაზე ისაუბრა.
შეგახსენებთ, რომ 2014 წლის ივლისში უკრაინის პარლამენტმა ქვეყნის მთავრობას, აღმასრულებელ ხელისუფლებას და რადას დეპუტატებს ხელფასის ოდენობა შეუმცირა.
,,თუ დღეს იმ ხელფასით ვიმსჯელებთ, რასაც თქვენ სახელმწიფო ჩინოვნიკებს უხდით, ისინი ან მართლა წმინდანები არიან, ან ყველა მათგანი იპარავს." - განაცხადა სააკაშვილმა.
ის გამოვიდა ინიციატივით, შეამცირონ სახელმწიფო აპარატის თანამშრომლები, თანამდებობებზე ახალი პირები მიიყვანონ და მათ ხელფასი რამდენიმე ათასი აშშ დოლარის ოდენობით დაუნიშნონ.
,,ჩვენ გათვლილი გვქონდა, რომელ ჩინოვნიკს რა სარგებლობის მოტანა შეეძლო... თუ შენ ქვეყნის სასარგებლოდ მუშაობ, მაშინ შენი საბანკო ანგარიშიც უნდა გაიზარდოს." - აღნიშნა პოროშენკოს მრჩეველმა და საქართველოს ექს-პრეზიდენტმა.