საქართველოში ნატოს სამეკავშირეო ოფისის ხელმძღვანელი უილიამ ლაჰიუ რუსეთის საგარეო უწყების ხემძღვანელის სერგეი ლავროვისა და საქართველოს პრემიერ-მინისტრის სპეციალური წარმომადგენლის რუსეთთან ურთიერთობის საკითხებში ზურაბ აბაშიძის განცხადებას ეხმიანება და აღნიშნავს, რომ ნატოს თითოეული წევრი სუვერენული ქვეყანაა, რომელიც თავად ირებს გადაწყვეტილებას ალიანსის წევრობასა და მეზობლებთან ურთიერთობაზე.
,, ნატო არავის ჩათრევას არ გეგმავს ალიანსში. ქვეყნები თავად ითხოვენ წევრობას. ნატოს თითოეული წევრი სუვერენული ქვეყანაა რომელიც თვითონ წყვეტს ალიანსში შესვლის, თუ მეზობლებთან ურთიერთობის საკითხებს. რაც შეეხება არსებით პაკეტს და ნატოს ინფრასტრუქტურას, მნიშვნელოვანია გვახსოვდეს, ინფრასტრუქტურა რომელიც საქართველოშია ეკუთვნის საქართველოს, მის ხელისუფლებას, ეს არ არის ე.წ. ნატოს ინფრასტრქუტურა, ეს იქნება ერთობლივი დაწესებულება რომელსაც ფლობს და ძირითად ოპერირებს საქართველო და ნატოს წევრი სახელმწიფოების მხარდაჭერით", -განაცხადა უილიამ ლაჰიუმ.
პრემიერ-მინისტრის სპეციალური წარმომადგენლის რუსეთთან ურთიერთობის საკითხებში ზურაბ აბაშიძის განცხადებით, ნატო-საქართველოს თანამშრომლობა არ არის მიმართული იმ მიზნისკენ, რომ საქართველოში ნატო-ს სამხედრო ინფრასტრუქტურა განთავსდეს.
,,მოგეხსენებათ, საქართველო დამოუკიდებელი ქვეყანაა, ამიტომ აქვს სრული უფლება, ითანამშრომლოს ნებისმიერ საერთაშორისო ორგანიზაციასთან, მათ შორის ნატო-სთან, რომელიც გახლავთ მეტად ავტორიტეტული საერთაშორისო ორგანიზაცია. ეს თანამშრომლობა არანაირად არ არის მიმართული იმ მიზნისკენ, რომ საქართველოში განთავსდეს ნატო-ს სამხედრო ინფრასტრუქტურა. ასეთი გეგმა ბუნებაში არ არსებობს. საქართველო საერთოდ არ გადადგამს ისეთ ნაბიჯს, რომელიც ზიანს მიაყენებს რეგიონულ უსაფრთხოებას. რეგიონულ უსაფრთხოებას, საქართველოს უსაფრთხოებას, საქართველოს ტერიტორიული მთლიანობის პრინციპს უპირველესად საფრთხეს უქმნის აფხაზეთისა და ცხინვალის რეგიონის ოკუპაცია, რუსეთის სამხედრო ჯარების, სამხედრო ინფრასტრუქტურის განლაგება", - განაცხადა ზურაბ აბაშიძემ.
ხოლო გუშინ რუსეთის საგარეო საქმეთა მინისტრმა, სერგეი ლავროვმა ე.წ სამხრეთ ოსეთის საგარეო საქმეთა დეფაქტო მინისტრთან ერთად გამართულ პრესკონფერენციაზე განაცხადა, რომ თუ ნატო საქართველოს ალიანსში "ჩათრევის" პრაქტიკულ ნაბიჯებს გადადგამს, რუსეთი ამას შესაბამისი ზომებით უპასუხებს.