მიხეილ სააკაშვილი - მინდა დავსვა კითხვა - დღეს ხართ თუ არა უკეთესად, ჩემო ძვირფასო თანამემამულეებო, ჩემო საყვარლებო, ვიდრე 2012 წლის 1-ელ ოქტომბერს?
- ასევე, ჩემო ძვირფასო თანამემამულევ და საყვარელი ექსპრეზიდენტო (თუ პრეზიდენტო? აღარ ვიცი, რომელი ხართ უკვე!), მამულიდან დევნილო თუ ახალ განზომილებაში მყოფო, ერის კეთილდღეობისთვის დამაშვრალო და სარწმუნოებისათვის დევნილო (გავიგეთ ჯერ კიდევ სკოლის პერიოდში ლურჯი მონასტრიდან თქვენი ექსორიადყოფის შესახებაც)... მალე ახალ „ზეციურ საქართველოს~ ორიგინალს უკრაინაშიც ვიხილავთ, თქვენის დიდი წყალობითა და შემწევნობით, მაგრამ, მანამ ცხოვრების ამაოებისა და წარმავლობის, წუთისოფლის ორგემაგობის საკითხები გაწუხებთ, ვიცი, და ასეთ ფონზე ერთი ყოფითი შეკითხვაც დაგვისვით: მითხარით ერთი სფერო მაინც საქართველოში, რომელიც 2012 წლის არჩევნების შემდეგ გაუმჯობესდა!
ჰოდა, მოგეხსენებათ სიტყვაძვირი თუ სიტყვაძუნწი თქვენი საყვარელი და ძვირფასი თანამემაულეების ამბავი და, ვაითუ, არავინ გიპასუხოთ, ამიტომ მე ჩემს სფეროს შესახებ მივაწვდენ თქვენს უნაკლო სმენას ერთ სიახლეს, ოღონდ მანამდე თქვენს საამაყო წარსულში დაგაბრუნებთ:
გახსოვთ ქართული მეცნიერების ეროვნული ნიადაგიდან ამოძირკვის მანიაკური იდეის ხორცშეხმის მეტი რომ არაფერი გადარდებდათ?! 2006 წელს თქვენმა მთავრობამ უკლებლივ ყველა სამეცნიერო დაწესებულება და აკადემიის ცენტრალური სამეცნიერო ბიბლიოთეკა რომ გამოიყვანა მეცნიერებათა აკადემიის შემადგენლობიდან და საჯარო სამართლის იურდიული პირის სტატუსით დაუქვემდებარა განათლებისა და მეცნიერების სამინისტროს?!
გახსოვთ მაშინდელი პრემიერ-მინისტრის, ნიკა გილაურის, მიერ ხელმოწერილი საქართველოს მთავრობის 2010 წლის 9 ივლისის დადგენილება, რომლითაც მსოფლიოში ცნობილი სამეცნიერო-კვლევითი ინსტიტუტები უნივერსიტეტებს შეუერთეთ?! ამ გადაწყვეტილებით მეცნიერებათა აკადემიის ყოფლ ინსტიტუტებს მხოლოდ კუთვნილი მოძრავი ქონება დაუკანონეთ და არა - შენობები და ეს ნაგებობებიც საპრივატიზაციო ნუსხაში რომ შეიტანეთ?!
გახსოვთ, ჩემო ძვირფასო და საყვარელო, ის ცინიკურად შეგნებული და გააზრებული ნგრევის პოლიტიკა? აბა, გაიხსენეთ მისთვის სპეციალურად აგებული შენობიდან გამოძევებული ა. რაზმაძის სახელობის მათემატიკის ინსტიტუტი; ევგენი ხარაძის აბასთუმნის ასტროფიზიკური ობსერვატორიის ქალაქის ლაბორატორიისთვის წართმეული შენობა, ფაქტობრივად, ტურისტულ ბაზად ქცეული ობსერვატორიის უნიკალური კომპლექსი ყანობილის მთაზე??
გახსოვთ, როგორ გააუქმეთ დ. უზნაძის ფსიქოლოგიისა და ს. წერეთლის ფილოსოფიის ინსტიტუტები?!...
ვიცი, არ გეტყოდათ არავინ (ხომ მოგეხსენებათ, გარემოცვა ღუპავს თვით უძლეველ ხელისუფალსაც კი!), თქვენს გუნდს, არც მანდ და არც აქ შთენილებს, მეცნიერება გულზე არ ეხატება, უფრო მეტიც - არარსებულად მიიჩნევენ! ახლა კი უნდა გაგახაროთ და გითხრათ, რომ ნგრევა შეჩერებულია და, ინფრასტრუქტურის გამართვასთან ერთად, პირველად 2015 წლიდან მეცნიერის ხელფასი 150-160 ლარის ნაცვლად 400 ლარი გახდა. გილოცავთ, ჩემო საყვარელო და ძვირფასო! იმედია, ჩვენთან ერთად, თქვენც გაიხარეთ!!!!
საბა მეტრეველი