თავდაცვის მინისტრს დღეს რუსეთთან ურთიერთობების საკითხებში, საქართველოს პრემიერ-მინისტრის სპეციალური წარმომადგენლის ზურაბ აბაშიძის განცხადებაზე მოუხდა გარკვეული დეტალების დაზუსტება. როგორც ცნობილია, ზურაბ აბაშიძემ განაცხადა, რომ ნატო-საქართველოს თანამშრომლობა არანაირად არ არის მიმართული იმ მიზნისკენ, რომ საქართველოში განთავსდეს ნატო-ს სამხედრო ინფრასტრუქტურა.
"ბატონი ზურაბი სავარაუდოდ გულისხმობდა, რომ საქართველოში არ იგეგმება ნატოს სამხედრო ბაზის განთავსება. საქართველოში იგეგმება წვრთნისა და შეფასების ცენტრის დაარსება რომელიც მოემსახურება ჩვენი შეიარაღებული ძალების სამხედრო მოსამსახურეების პროფესიონალიზმის და მათ ნატოსთან თავსებადობის ხარისხის ამაღლებას. ანუ ეს არ არის სამხედრო ბაზა, რომელსაც აქვს სამხედრო მიზნები და ამოცანები. ეს არის წვრთნისა და შეფასების ცენტრი, რომელსაც აქვს შესაბამისად წვრთნისა და შემდგომი შეფასების ფუნქცია",- განაცხადა თავდაცვის მინისტრმა მინდია ჯანელიძემ.
მინისტრის თქმით, რომელმაც კომენტარისას გაკეთებისას ცენტრს "ბაზა" უწოდა, ის გაკვირვებულია თუ რატომ ანერვიულებს რუსეთს საქართველოში წვრთნისა და შეფასების ცენტრის დაარსება.
"ამიტომ მე ცალსახდ მინდა ავღნიშნო, რომ ამ ბაზას არ აქვს არავითარი შეტევითი, აგრესიული მიზნები. ეს არის მხოლოდ და მხოლოდ ჩვენი შეიარაღებული ძალების განვითარებისკენ და ჩვენი შეიარაღებული ძალების ნატოსთან თავსებადობისკენ მიმართული. მე მიკვირს, რატომ ანერვიულებს ჩვენს მეზობლებს ამ ცენტრის დაარსება", - აღნიშნა მინდია ჯანელიძემ.
შეგახსენებთ, რომ რუსეთის საგარეო საქმეთა მინისტრმა, სერგეი ლავროვმა განაცხადა, რომ თუ ნატო საქართველოს ალიანსში "ჩათრევის" პრაქტიკულ ნაბიჯებს გადადგამს, რუსეთი ამას შესაბამისი ზომებით უპასუხებს.
"ჩვენ განვიხილეთ თანამშრომლობის საკითხები, მათ შორის კავკასიის რეგიონში უსაფრთხოებისა და სტაბილურობისათვის რუსეთისა და სამხრეთ ოსეთის ჟენევის დისკუსიებში მონაწილეობის საკითხი. ამასთან, ჩვენ კიდევ ერთხელ დავადასტურეთ, რომ საჭიროა, სავალდებულოდ შესასრულებელი დოკუმენტის გაფორმება ძალის არგამოყენებასთან დაკავშირებით, რაც 2008 წლის მოვლენების გამეორებას თავიდან აგვაცილებს" - აღნიშნა ლავროვმა.