თუ საქართველოში რაიმე არეულობაზეა საუბარი ამის მიზეზი საოკუპაციო ჯარია, რომელიც საქართველოში დგას, აღნიშნულის შესახებ განცხადება საქართველოს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ რუსეთის საგარეო საქმეთა მინისტრის სერგეი ლავროვის კომენტარის შეფასებისას გააკეთა.
დავით ბაქრაძის განმარტებით, საქართველოს ნატოში ინტეგრაციის პროცესი სხვა სახელმწიფოს წინააღმდეგ მიმართული არ არის.
"რაც შეეხება საქართველოსა და ნატოს ურთიერთობებს, საქართველოს ნატოში ინტეგრაციის პროცესი არ არის მიმართული მესამე სახელმწიფოს წინააღმდეგ. რაც შეეხება ინფრასტრუქტურას, ნატო-საქართველოს არსებითი პაკეტით განსაზღვრულია საქართველოში შემდგომი ღონისძიებები, რომელიც გეგმის სრული დაცვით მიმდინარეობს", განმარტა დავით ბაქრაძემ.
შეგახსენებთ, რომ რუსეთის საგარეო საქმეთა მინისტრმა, სერგეი ლავროვმა განაცხადა, რომ თუ ნატო საქართველოს ალიანსში "ჩათრევის" პრაქტიკულ ნაბიჯებს გადადგამს, რუსეთი ამას შესაბამისი ზომებით უპასუხებს.
