,,10 წელი, პრაქტიკულად, ქვეყანას ვმართავდი და ქვეყნიდან წასვლა რომ მდომოდა, ისე წავიდოდი, რეპუტაციას არ შევილახავდი", -ამის შესახებ დედაქალაქის ყოფილმა მერმა გიგი უგულავამ საქალაქო სასამართლოში მიმდინარე პროცესზე ბრალდების მხარის საპასუხოდ განაცხადა.
უგულავას განცხადებით, მისი მისამართით პოლიტიკური დევნა მიმდინარეობს.
,,ვიღაცამ თქვენი ხელმძღვანელობა დაარწმუნა იმაში, რომ მე ქვეყნიდან გაქცევას ვაპირებდი. ალბათ ეს ვარაუდი იმის შემდეგ გაჩნდა, რაც მე პასპორტი გამიუქმეს და თავიდან შევიტანე პასპორტი ყველა საელჩოში. როგორც ჩანს, მე ვიყავი მუდმივი მეთვალყურეობის ქვეშ და ეს გარემოება აღიქვეს ისე, რომ მე ქვეყნიდან წასვლას ვაპირებდი", - განაცხადა უგულავამ.
შეგახსენებთ, რომ საქალაქო სასამართლოში დედაქალაქის ყოფილი მერის გიგი უგულავას სასამართლო სხდომა მიმდინარეობს. პროკურატურის წარმომადგენლების განცხადებით, ბრალდების მხარე გიგი უგულავასთვის გირაოს შეფარდების მომხრე არ არის, რადგან ამ შემთხვევაში არსებობს საფრთხე, რომ ის მიიმალება.
დაცვის მხარე "სითი პარკის" საქმეზე ბრალდებულ უგულავასთვის ოციათასლარიანი გირაოთი გათავისუფლებას ითხოვს.
მასალის გამოყენების პირობები
