საქალაქო სასამართლოში დედაქალაქის ყოფილი მერის გიგი უგულავას სასამართლო სხდომა განახლდა. ცოტა ხნის წინ სხდომაზე განცხადება პროკურატურის წარმომადგენლებმა გააკეთა და აღნიშნა, რომ ბრალდების მხარე გიგი უგულავასთვის გირაოს შეფარდების მომხრე არ არის.
"თუ გირაოს საფუძველზე გიგი უგულავას აღმკვეთი ღონისძიება შეეცვლება, არსებობს საფრთხე, რომ ის მიიმალება. ასევე არსებობს იმის საფრთხე, რომ ის მოახდენს ზეწოლას მოწმეებზე. შეგახსენებთ, რომ გიგი უგულავა დავაკავეთ მაშინ, როდესაც ის აპირებდა მიმალვას. აუცილებელია, პატიმრობა იყოს გამოყენებული," - განაცხადეს სასამართლო სხდომაზე პროკურატურის წარმომადგენლებმა.
ბრალდებისა და დაცვის მხარის განცხადებების შემდეგ მოსამართლემ უნდა მიიღოს განჩინება, გათავისუფლდება თუ არა დედაქალაქის ყოფილი მერი პატიმრობიდან.
შეგახსენებთ, რომ დაცვის მხარე "სითი პარკის" საქმეზე ბრალდებულ უგულავასთვის ოციათასლარიანი გირაოთი გათავისუფლებას ითხოვს.
მასალის გამოყენების პირობები
