დედაქალაქის მერი დავით ნარმანია გამორიცხავს, რომ კორუფციულ გარიგებებში თბილისის მერიის მაღალი რანგის თანამდებობის პირებიც იყვნენ ჩართული.
,, გამორიცხულია მაღალი რანგის თანამდებობის პირების ჩართვა", -განაცხადა დავით ნარმანიამ ,,იმედის კვირაში" საუბრისას.
ნარმანიას განცხადებით, მისთვის უცნობი იყო, რომ მერიის თანამშრომელი ჯოკია ბოდოკია ნასამართლევი იყო ნაკოდანაშულისთვის.
,,ჯოკია ბოდოკია ჩართული იყო ჩემს წინასაარჩევნო კამპანიაში. მე ის დამხვდა კოალიციაში როცა მივედი, იქ მუშაობდა. უშუალოდ იყო თბილისის შტაბში შეხვედრების ორგანიზატორი და ადმინისტრაციული ფუნქციებით იყო დაკავებული.როცა პერიოდულად მიმდინარეობდა საკადრო ცვლილებები იქნა დანიშნული ერთ-ერთი სამსახურის აპარატის უფროსად. ეს არ იყო საკვანძო თანამდებობა. ჩემთვის ნამდვილად არ იყო ცნობილი, რომ ის ნასამართლევი იყო. სამსახურში დანიშვნის პერიოდში მას ნასამართლეობა უკვე გაქარწყლებული ჰქონდა", - აღნიშნა ნარმანიამ.
შეგახსენებთ, რომ თბილისის საქალაქო სასამართლომ დედაქალაქის ზედამხვედველობის სამსახურის აპარატის უფროს ჯოკია ბოდოკიას აღმკვეთის ღონისძიებად პატიმრობა შეუფარდა. გამოძიების ვერსიით, მან ერთ-ერთ კომპანიას, გარკვეული შეღავათების უზრუნველყოფის პირობით, 180 ათასი აშშ დოლარი მოსთხოვა, თანხის ნაწილი - 50 ათასი დოლარი კი წინასწარ გამოართვა.
ბრალდებული დუმილის უფლებას იყენებს. თუმცა, მისი ინტერესების დამცველის განმარტებით, ბოდოკია დანაშაულს არ აღიარებს.