იმისათვის რომ გავთავისუფლდეთ იმ ზიანისგან, რომელსაც ეს მთავრობა, ივანიშვილის ხელმძღვანელობით, ყოველ დღე აყენებს ქვეყანას, ეს ხალხი უნდა შევცვალოთ დემოკრატიული გზით. ამის შესახებ „ნაციონალური მოძრაობის" საერთაშორისო მდივანმა გიგა ბოკერიამ რუსთავი 2-ისთვის მიცემულ კომენტარში განაცხადა.
მისი თქმით, იმის ნაცვლად, რომ ბიძინა ივანიშვილი და მისი გუნდი საქმით დაკავდეს,"სისულელეებს" ლაპარაკობს.
"ადამიანი იმდენ სისულელეს იძახის, რომ გვაბნევს"-აცხადებს გიგა ბოკერია.
ბოკერიამ აღნიშნა, რომ საქართველოს მთავრობა საერთაშორისო ასპარეზზე ქვეყნის ინტერესებზე წინ პირად დამოკიდებულებებს აყენებს.
ბოკერია მიიჩნევს, რომ უკრაინის ელჩის საგარეო უწყებაში დაბარებით, ივანიშვილი "ნაციონალური მოძრაობის" მიმართ არსებულ პირად უკმაყოფილებას საერთაშორისო ასპარეზზეც ვერ მალავს.
"ივანიშვილს და მის გუნდს როგორც ჩანს, დღემდე არ ესმით მნიშვნელობა იმისი, რაც ხდება უკრაინაში. ისინი თავის პირად ბოღმას, აბსოლუტურად არაადეკვატურ დამოკიდებულებას ოპონენტების წინააღმდეგ ავრცელებენ საერთაშორისო ასპარეზზე და ამას ჩვენი ქვეყნის ინტერესებზე მაღლა აყენებენ და არც ის ესმით, რომ იქ სააკაშვილის და სხვა პირების დანიშვნა არის ფაქტიურად ქართული რეფორმების პრესტიჟი," - განაცხადა გიგა ბოკერიამ.
