საპარლამენტო უმრავლესობის ლიდერმა დავით საგანელიძემ თანაგუნდელი ზაქარია ქუცნაშვილი სიცრუის ტირაჟირებაში დაადანაშაულმა და მიზეზად ქუცნაშვილის უზენაესი სასამართლოს თავმჯდომარედ გახდომის დიდი სურვილი დაასახელა.
,,სამწუხაროდ, ზაქარია ქუცნაშვილს იმდენად უნდა უზენაესი სასამართლოს თავმჯდომარეობა, ხშირ შემთხვევაში თავის თავს აძლევს უფლებას, თქვას იმდენი სიცრუე და სისულელე, რომ მერე თვითონ ვარდება მძიმე სიტუაციაში", _ განაცხადა , - დავით საგანელიძემ ფრაქცია "ქართული ოცნება - დემოკრატიული საქართველოს" სხდომის დაწყების წინ.
მისივე განმარტებით, თუ ქუცნაშვილს, ინფორმირებულობასთან დაკავშირებით, პრობლემა აქვს პირველ რიგში უნდა ჰკითხოს ფრაქციის ხელმძღვანელს.
,,უმრავლესობაში არის შვიდი ფრაქცია, შვიდიდან ექვსს არავითარი პრეტენზია არაფერზე არ გამოუთქვამს, რადგან არანაირი პრობლემა უმრავლესობაში არ იყო, ეს არის ფრაქციის პრობლემა. სწორედ ამიტომ ვატარებთ სხდომას, რომ ეს პრობლემა მოგვარდეს. თუ ქუცნაშვილს რამე პრობლემა აქვს ინფორმირებულობასთან დაკავშირებით, პირველ რიგში უნდა ჰკითხოს ფრაქციის ხელმძღვანელს", -აცხადებს საგანელიძე.