ექსპერტი სოსო ცისკარიშვილი ,,ჯი-ეიჩ-ენთან" საუბარში აცხადებს, რომ თბილისის მერიაში უკვე დიდი ხანია სისტემური პრობლემები არსებობს და სწორედ ამის მოსაგვარებლად მივიდა უწყებაში დავით ნარმანია.
,,თბილისის მერიაში უკვე დიდი ხანია არსებობს სისტემური პრობლემები. სწორედ ამ ვითარების შესაცვლელაც იყო მოაზრებული დავით ნარმანია. Mმან მიუღებლად შეფასა არსებული ვითარება და პირობა დადო, რომ სრული სიმკაცრით იქნებოდა განხილული საკითხი და დამნაშავე დასჯილი", _განაცხადა ცისკარიშვილმა.
მისივე თქმით, თუ გამოვლინდება, რომ თბილისის მერიის ზედამხედველობის სამსახურის აპარატის უფროსი ჯოკია ბოდოკია დანაშაულის ჩადებაში მარტო არ იყო მაშინ დავით ნარმანიას სერიოზული გადაწყვეტილებების მიღება მოუწევს.
,,გამოძიებასთან თანამშრომლობა იქნება სერიოზული მერიის ხელმძღვანელობის მიერ, მაგრამ დაკავებული პირი არ არის ეული საკუთარ დანაშაულში მაშინ უფრო სერიოზული გადაწყვეტილებების მიღება მოუწევს თბილისის მერს და არა მგონია, ნარმანიამ ასეთი რეაქცია დააგვიანოს", _განაცხადა ცისკარიშვილმა.
კითხვაზე აქვს თუ არა მოლოდინი რომ დავით ნარმანიამ მის უწყებაში კორუფციის დამარცხებას შეძლებს პასუხობს:
,,თუ მიხვდება, რომ ამას ვერ ახერეხებს, მაში თვითონ გადადგება, ვიდრე კორუფციას შეეგუება", _აცხადებს ცისკარიშვილი ,,ჯი-ეიჩ-ენთან" საუბარში.
შეგახსენებთ, რომ გუშინ შინაგან საქმეთა სამინისტროს ანტიკორუფციული სააგენტოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, განსაკუთებით დიდი ოდენობით ქრთამის აღების ფაქტზე, ქალაქ თბილისის მერიის ზედამხედველობის სამსახურის აპარატის უფროსი, 1972 წელს დაბადებული ჯოკია ბოდოკია დააკავეს.
თბილისის მუნიციპალიტეტის მერიის ზედამხედველობის სამსახურის აპარატის უფროსმა ჯოკია ბოდოკიამ ერთ-ერთი კერძო კომპანიის წარმომადგენელს სასტუმროს მშენებლობის ნებართვის გაცემაში დახმარებისა და მშენებლობის პროცესში მფარველობის გაწევის სანაცვლოდ, ქრთამის სახით მოსთხოვა სასტუმროს მშენებლობის ღირებულების 10 % - 180 000 აშშ დოლარი, საიდანაც წინასწარ, ქრთამის სახით აიღო მოთხოვნილი თანხის ნაწილი - 50 000 აშშ დოლარი.
გამოძიება განსაკუთრებით დიდი ოდენობით ქრთამის აღების ფაქტზე მიმდინარეობს (საქართველოს სისხლის სამართლის კოდექსის 338-ე მუხლის მე-3 ნაწილის „ე" ქვეპუნქტით, რაც სასჯელის სახით 11-დან 15 წლამდე თავისუფლების აღკვეთას ითვალისწინებს).