სტრასბურგში, საქართველოს პარლამენტის ევროპასთან ინტეგრაციის კომიტეტის თავმჯდომარემ ვიქტორ დოლიძემ აღმოსავლეთ პარტნიორობის საპარლამენტო ასამბლეის - ევრონესტის ბიუროს სხდომაში მიიღო მონაწილეობა.
სხდომას ევრონესტის საპარლამენტო ასამბლეის ევროპული კომპონენტის მხრიდან ევროპარლამენტარები, ხოლო აღმოსავლეთ პარტნიორი კომპონენტის მხრიდან საქართველო, აზერბაიჯანი, სომხეთი, მოლდოვა და უკრაინა ესწრებოდა.
ბიუროს სხდომაზე საპარლამენტო ასამბლეის 2014 წლის ოქტომბერში გამართული სხდომის ოქმი დაამტკიცეს და 2015 წლის პირველი ნახევრის სამუშაო კალენდარზე იმსჯელეს.
ბიუროს სხდომაზე, 2015 წლის 16-18 მარტს ერევანში დაგეგმილი ევრონესტის საპარლამენტო ასამბლეის მეოთხე პლენარული სხდომის პროგრამა და სამუშაო გეგმა დაამტკიცეს. უკრაინის დელეგაციის ხელმძღვანელისა და ევრონესტის საპარლამენტო დელეგაციის თანაპრეზიდენტის ბორის ტარასიუკის ინიციატივით, გადაწყდა, რომ უკრაინის წინააღმდეგ რუსეთის სამხედრო აგრესიის შესახებ რეზოლუციის განხილვა ერევანში მოხდება. ამ საკითხის პლენარული სხდომის დღის წესრიგში შეტანას მხოლოდ საქართველოს მხარემ დაუჭირა მხარი. რეზოლუციის განხილვისას ვიქტორ დოლიძე სიტყვით გამოვიდა. „საქართველოს პოზიცია უკრაინის შესახებ მკაფიოა. უკრაინა საქართველოს მეგობარი და სტრატეგიული პარტნიორია. ის რაც ხდება ამჟამად უკრაინაში და რასაც აკეთებს რუსეთი არის არა მხოლოდ უკრაინის პრობლემა, არამედ არსებული სიტუაცია საფრთხეს უქმნის რეგიონის და ევროპის უსაფრთხოებასაც" - განაცხადა ვიქტორ დოლიძემ
ერევანში დაგეგმილ სამიტზე მონაწილეობის მიღებას არ აპირებს აზერბაიჯანის დელეგაცია. ევრონესტის საპარლამენტო ასამბლეის თანაპრეზიდენტებთან ჰეიდი ჰაუტალასთან და ბორის ტარასიუკთან ერთად, ვიქტორ დოლიძემ აზერბაიჯანის მხარეს მოუწოდა, რათა აუცილებლად მიიღონ მონაწილეობა სამიტში, ვინაიდან მონაწილეობის არმიღებით პრობლემა არ გადაიჭრება.
ევრონესტის საპარლამენტო ასამბლეა რიგის აღმოსავლეთ პარტნიორობის სამიტზე სახელმწიფო მეთაურებსა და მთავრობებს მიმართავს და რეკომენდაციას წარადგენს, სადაც უკრაინაში არსებულ ვითარებაზე, საქართველოს, უკრაინისა და მოლდოვას მიერ ასოცირების შესახებ შეთანხმებით ნაკისრი ვალდებულებების შესრულებაზე, ვიზის ლიბერალიზაციის კუთხით მიღწეულ პროგრესზე და აღმოსავლეთ პარტნიორობის წევრი ქვეყნებისათვის უვიზო მიმოსვლის მინიჭებაზე იქნება საუბარი. ვიქტორ დოლიძის თქმით, რეკომენდაცია აუცილებლად უნდა შეიცავდეს უფრო კონკრეტულ მესიჯებს, დოკუმენტში უნდა აღინიშნოს, რომ მოხდეს ასოცირების შეთანხმების რატიფიცირების პროცესის დაჩქარება და უვიზო მიმოსვლის უფლების მინიჭება საქართველოსათვის. ასევე უკრაინაში არსებულ ვითარებაზე უნდა მოხდეს უფრო ქმედითი ნაბიჯების გადადგმა. „აგრესიული არ უნდა ვიყოთ რუსეთის წინააღმდეგ, მაგრამ უნდა ვიყოთ აქტიურები და უფრო კონკრეტული მესიჯები გავაჟღეროთ"- აღნიშნა ვიქტორ დოლიძემ.
