საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე მინსკში მიმდინარე „ნორმანდიული ოთხეულის" მოლაპარაკებებს ეხმიანება. როგორც მთავრობის სხდომის დაწყებამდე აბაშიძემ განაცხადა შეხვედრა უმნიშვნელოვანესია არამხოლოდ უკრაინისთვის, არამედ მთელი ევროპისათვის, რადგან სწორედ ევროპის უსაფრთხოებას უქმნის საფრთხეს უკრაინაში მიმდინარე პროცესები.
„ყველასთვის უმნიშვნელოვანესი შეხვედრაა. როგორც უკრაინის პრეზიდენტმა თქვა, ბოლო შანსია იმისათვის, რომ მშვიდობიანად მოგვარდეს ეს უმძიმესი ვითარება, რაც ყველაზე ახდენს გავლენას, მათ შორის ევროპის უსაფრთხოებაზე. მე ვფიქრობ, რომ გლობალურ პრობლემად იქცა. ამიტომაა ასეთი დიდი ყურადღება. ჯერ ახალი არაფერი არ არის, მაგრამ, ალბათ, დღის ბოლოს გვეცოდინება შედეგები," - განაცხადა ზურაბ აბაშიძემ.
შეგახსენებთ, რომ უკვე მეთოთხმეტე საათია, მინსკში შეხვედრა მიმდინარეობს. უკრაინის, გერმანიის, საფრანგეთის და რუსეთის პირველი პირები უკრაინის კრიზისის გადაწყვეტას ცდილობენ.
მასალის გამოყენების პირობები