ევროპასთან ინტეგრაციის კომიტეტის თავმჯდომარე ვიქტორ დოლიძე ოფიციალური ვიზიტით, სტრასბურგში იმყოფება. ვიზიტის ფარგლებში მან შეხვედრები გამართა ევროპარლამენტარებთან, პეტრას აუსტრევიჩუსთან და მიხალ ბონისთან. შეხვედრებზე ვიქტორ დოლიძემ აღმოსავლეთ პარტნიორობის ფარგლებში არსებულ საპარლამენტო თანამშრომლობაზე, ევროკავშირთან ასოცირების შესახებ შეთანხმების რატიფიცირების პროცესზე და საქართველოს კანონმდებლობის ევროკავშირის კანონმდებლობასთან ჰარმონიზაციაზე ისაუბრა. შეხვედრებზე მაისში დაგეგმილ აღმოსავლეთ პარტნიორობის რიგის სამიტსა და საქართველოსთვის მის მნიშვნელობაზე ისაუბრეს.
„2015 წლის მაისში, რიგაში დაგეგმილი აღმოსავლეთ პარტნიორობის სამიტი საქართველოსთვის უმნიშვნელოვანესია, სადაც აუცილებლად უნდა მოხდეს სამი ყველაზე მნიშვნელოვანი ფაქტის დეკლარირება: საქართველოსათვის ევროპული პერსპექტივის ოფიციალურად მინიჭება, საქართველოსა და ევროკავშირს შორის უვიზო მიმოსვლის გადაწყვეტილების მიღება და ასოცირების შესახებ შეთანხმების რეტიფიკაციის პროცესის დაჩქარება ევროკავშირის წევრი ქვეყნების მიერ", - აღნიშნა ევროპასთან ინტეგრაციის კომიტეტის თავმჯდომარემ.
ვიქტორ დოლიძემ საქართველოში მიმდინარე ისეთ მნიშვნელოვან მოვლენებზე ისაუბრა, როგორიცა უზენაესი სასამართლოს თავმჯდომარის არჩევა და ამჟამად პრეზიდენტისთვის წარდგენილი კანდიდატებია. მან ასევე, ყურადღება გაამახვილა საქართველოში არსებულ ეკონომიკურ ვითარებაზე, პროკურატურასა და შინაგან საქმეთა სამინისტროში და ვიზის ლიბერალიზაციის სამოქმედო გეგმით გათვალისწინებული რეფორმების გატარების აუცილებლობაზე.
შეხვედრაზე მხარეებმა უკრაინაში არსებული ვითარებაზე განიხილეს. როგორც აუსტრევიჩუსმა აღნიშნა, სამწუხაროდ ევროპარლამენტშიც არიან სკეპტიკურად განწყობილი პარლამენტარები, რომელებიც ფიქრობენ, რომ უკრაინაში ამჟამად სამოქალაქო ომია, რუსეთი არ იბრძვის უკრაინის წინააღმდეგ და ევროპამ იარაღი არ უნდა მიაწოდოს უკრაინას. ასევე, რუსეთისადმი ლოიალურად განწყობილი ევროპარლამენტარები თვლიან, რომ რუსეთის წინააღმდეგ ევროკავშირმა სანქციები უნდა გააუქმოს.
ევროპარლამენტში მეორე შეხვედრა ევრონესტის პოლიტიკური, ადამიანის უფლებათა და დემოკრატიის კომიტეტის თანათავმჯდომარეების რანგში ვიქტორ დოლიძემ ევროპარლამენტარ მიხალ ბონისთან გამართა. მხარეებმა მარტში, ერევანში დაგეგმილი ევრონესტის საპარლამენტო ასამბლეის მეოთხე პლენარულ სხდომის ანგარიში განიხილეს, რომელსაც ვიქტორ დოლიძე და მიხალ ბონი წარადგენენ და რომელიც ევროკავშირსა და აღმოსავლეთ პარტნიორობის ქვეყნებს შორის უფრო მჭიდრო ჩართულობასა და თანამშრომლობას გულისმობს, ევროპის სამეზობლო პოლიტიკის ფარგლებში 2014-2020 წლებში.
შეხვედრაზე აპრილში ბონის საქართველოში ვიზიტი დაიგეგმა, რომლის დროსაც მიხალ ბონი მაღალი დონის შეხვედრებს გამართავს. იგი ევროპასთან ინტეგრაციის კომიტეტის სხდომაზე მოხსენებით წარდგება, რომელიც ერთგვარი რევიზია იქნება საქართველოს მიერ ასოცირების შესახებ შეთანხმებით აღებული ვალდებულებებისა და ვიზის ლიბერალიზაციის კუთხით განხორციელებული ღონისძიებებისა. მოხსენებაში ყურადღება გამახვილებული იქნება საქართველოს მთავრობის მიერ განხორციელებულ რეფორმებზე - მიგრაციის პოლიტიკის, საზღვრის დაცვისა და თავშესაფრების მოწყობის კუთხით. ამ საკითხების დროული გადაჭრა აუცილებელია საქართველოსათვის ევროკავშირთან უვიზო მიმოსვლის უფლების მინიჭებისათვის.
დღეს, ვიქტორ დოლიძე ასევე მონაწილეობას მიიღებს აღმოსავლეთ პარტნიორობის საპარლამენტო ასამბლეის - ევრონესტის ბიუროს სხდომაში.
ბიუროს სხდომაზე საპარლამენტო ასამბლეის 2014 წლის ოქტომბერში გამართული სხდომის ოქმს დაამტკიცებენ და 2015 წლის პირველი ნახევრის სამუშაო კალენდარზე იმსჯელებენ. ბიუროს სხდომაზე, ასევე მოხდება 2015 წლის 16-18 მარტს ერევანში დაგეგმილი ევრონესტის საპარლამენტო ასამბლეის მეოთხე პლენარული სხდომის პროგრამისა და სამუშაო გეგმის დამტკიცება.
12 თებერვალს კი, საპროცედურო საკითხთა სამუშაო ჯგუფის შეხვედრა გაიმართება, სადაც საპროცედურო საკითხთა კომიტეტის მიერ შემუშავებული ცვლილებები განიხილება და განისაზღვრება მომავალი შეხვედრის თარიღი.