საქართველოს პრემიერის ირაკლი ღარიბაშვილის განმარტებით, უნგრეთის პრემიერ-მინისტრ ვიქტორ ორბანთან შეხვედრაზე ყურადღება გამახვილდა საქართველოს ევროკავშირთან ინტეგრაციის პროცესსა და ნატო-ში გაწევრიანების საკითხებზე. ასევე აღინიშნა, რომ საქართველო ევროკავშირთან ურთიერთობების ხარისხობრივად სრულიად ახალ ეტაპზე იმყოფება.
"აქტიურად ვემზადებით მაისში რიგაში დაგეგმილი „აღმოსავლეთ პარტნიორობის" სამიტისთვის. ჩვენი ამოცანაა, სამიტზე წარვდგეთ კონკრეტული შედეგებით და როგორც ევროკავშირის სანდო პარტნიორი, ვიყოთ წარმატების მაგალითი,"-განაცხადა ირაკლი ღარიბაშვილმა უნგრეთის პრემიერთან შეხვედრის შემდეგ გამართულ ერთობლივ პრესკონფერენციაზე.
ერთობლივი განცხადებების გაკეთებამდე, გაიმართა საქართველოს საგარეო საქმეთა სამინისტროსა და უნგრეთის საგარეო საქმეთა და ვაჭრობის სამინისტროს შორის ოქმის ხელმოწერის ცერემონია.