ორი დღის წინ ოკუპირებული აფხაზეთის საინფორმაციო საშუალებებმა რაულ ხაჯიმბასა და სამხრეთ კავკასიაში ევროკავშირის წარმომადგენელ ჰერბერტ ზალბერს შორის შეხვედრის დეტალების შესახებ ინფორმაცია გაავრცელეს.
აფხაზი ჟურნალისტების ცნობით, ზალბერმა სოხუმში ევროკავშირის წარმომადგენლობის ოფისის გახსნის სურვილი გამოთქვა.
ამ განცხადებას საქართველოს საგარეო საქმეთა სამინისტრო გამოეხმაურა და აღნიშნა, რომ ოკუპირებულ აფხაზეთში მსგავსი ოფისის გახსნა მხოლოდ ქართულ მხარესთან შეთანხმებით არის შესაძლებელი.
,,სოხუმის რეჟიმის მიერ გავრცელებული ინფორმაცია და მისი კონტექსტი, როგორც ეს ხშირად ხდება, გარკვეულ უზუსტობებს შეიცავს.
ევროკავშირი მყარად უჭერს მხარს საქართველოს სუვერენიტეტსა და ტერიტორიულ მთლიანობას. აქედან გამომდინარე, აფხაზეთის რეგიონში ნებისმიერი ოფისის გახსნა, სახელმწიფო ინტერესების გათვალისწინებით, ქართულ მხარესთან შეთანხმებით მოხდება." - ნათქვამია სამინისტროს განცხადებაში.
რაც შეეხება ევროკავშირის მიერ განხორციელებულ კონკრეტულ პროექტებს აფხაზეთში, საქართველოს საგარეო უწყებას მიაჩნია, რომ ეს ყოველივე ადგილობრივი მოსახლეობის დასახმარებლად და მათი ჰუმანიტარული მოთხოვნილებების დასაკმაყოფილებლად არის გამიზნული.
შეგახსენებთ, რომ ევროკავშირი აფხაზეთის რეგიონში, კერძოდ გალის რაიონში ინფრასტრუქტურულ, სოფლის-მეურნეობის და განათლების დარგში სხვადსხვა პროექტებს ახორციელებს.
სოხუმის ოფისთან დაკავშირებულ საკითხებზე ქართული მხარის განცხადება უყურადღებოდ არც ოკუპირებული აფხაზეთის ე. წ. საგარეო საქმეთა სამინისტროს დაუტოვებია.
უწყების წარმომადგენელთა აზრით, საქართველოს უფლება არა აქვს სოხუმში ევროკავშირის წარმომადგენლობის ოფისის გახსნის საქმეში ჩაერიოს.
,,საქართველოს, რა თქმა უნდა, ასეთი გადაწყვეტილების ეშინია, ვინაიდან მისი მიზანის გარე სამყაროსგან აფხაზეთის მაქსიმალური იზოლაცია წარმოადგენს.
თუმცა მსგავს გადაწყვეტილებებზე მას არავითარი ვეტოს უფლება არა აქვს." - განაცხადა ოკუპირებული აფხაზეთის საგარეო საქმეთა მინისტრის მოადგილემ ქაან ტანიამ.
მასალის გამოყენების პირობები