3 თებერვალს მოსკოვის ცენტრში მდებარე ერთ-ერთ კაფეში კრიმინალური სამყაროს 17 წარმომადგენელი დააკავეს, მათ შორის საქართველოს მოქალაქეები, გიორგი უგლავა, იგივე ,,ტახი" და კახა ფარფალია, იგივე ,,კახა."
მათ გარდა, იმიერბაიკალის მხარის პოლიციამ ჩიტაში კიდევ 6 კრიმინალური ლიდერი დააკავა, რომლებსაც ,,ტახის" მეთაურობით ბოლო ათი წლის განმავლობაში რეგიონში ერთ-ერთი უძლიერესი ბანდიტური დაჯგუფება ჰქონდათ შექმნილი.
ისინი ჩიტაში ქურდობითა და მანქანების გატაცებით დაკავებულ ჯგუფებს აკონტროლებდნენ. მონაწილეობდნენ, ასევე,თანხის გამოძალვის მიზნით ადამიანების გატაცებებში.
გიორგი უგლავამ ,,კანონიერი ქურდის" წოდება 1989 წელს მიიღო. მისი კრიმინალური გავლენის სფერო იმიერბაიკალის მხარესა და ბურიატიის რესპუბლიკაში ვრცელდებოდა. მის დაქვემდებარებაში მყოფ ჯგუფებში კრიმინალურ იდეოლოგიაზე დაფუძნებული მკაცრი დისციპლინა იყო დაცული.
რუსული მედიასაშუალებებით გავრცელებული ინფორმაციის თანახმად, ბოლო დრომდე, გიორგი უგლავა, იგივე ,,ტახი" იმიერბაიკალის ოლქის ე. წ. ,,მაყურებელი" იყო. მეორე კრიმინალურ ავტორიტეტთან ილშატ ივანოვთან იგივე ,,სადიკთან" ერთად ის ნეფრიტის (მინერალური ქვა) მოპოვება-წარმოებას აკონტროლებდა.
კრიმინალურ სამყაროში ,,სადიკს" ,,ნეფრიტის მეფესაც" უწოდებდნენ.
ის 2012 წელს დააპატიმრეს.
უგლავა და კრიმინალური სამყაროს კიდევ ერთი ლიდერი ამ დროისთვის ჩიტაში არიან გადაყვანილი, სადაც სისხლის სამართლის საქმეებთან მათი მონაწილეობის დამადასტურებელი მტკიცებულებების ძიება მიმდინარეობს.