საქართველოს საგარეო საქმეთა მინისტრის მოადგილემ გიგი გიგიაძემ გაცნობითი შეხვედრა გამართა საქართველოში უნგრეთის საგანგებო და სრულუფლებიან ელჩთან შანდორ საბოსთან. როგორც ,,ჯი-ეიჩ-ენს" საგარეო უწყებიდან აცნობეს შეხვედრაზე განხილულ იქნა საქართველოსა და უნგრეთს შორის არსებული ორმხრივი და მრავალმხრივი ურთიერთობების მიმდინარე საკითხები. ამ მხრივ, ყურადღება დაეთმო, მ/წლის 9-10 თებერვალს საქართველოს პრემიერ-მინისტრის ირაკლი ღარიბაშვილის უნგრეთში დაგეგმილ ვიზიტს.
მხარეებმა ისაუბრეს საქართველოს მოლოდინებზე რიგის „აღმოსავლეთ პარტნიორობის" სამიტზე და აგრეთვე საქართველოს მიერ ნატო-ს „არსებითი პაკეტის" იმპლემენტაციის მნიშვნელობაზე.
შეხვედრისას ხაზი გაესვა საქართველოს ოკუპირებულ ტერიტორიებზე არსებულ ვითარებას და საერთაშორისო არენაზე მიმდინარე აქტუალურ საკითხებს.
