,,თავისუფალი დემოკრატების" ერთ-ერთი ლიდერი ალექსი პეტრიაშვილი ზურაბ ვაზაგაშვილის საქმის გახსნას გამოეხმაურა და განმარტა, რომ ხელისუფლება ამ საქმის გახსნით ვერ აირიდებს იმ პასუხისმგებლობას, რომელიც იური ვაზაგაშვილის მკვლელობის საქმის გახსნაზე აკისრია.
,,სამწუხაროა, რომ ამ საქმის გახსნის კატალიზატორად იური ვაზაგაშვილის მკვლელობა იქცა და დღემდე პასუხგაუცემელი რჩება კითხვა, მიუხედავად იმისა, რომ გარკვეულმა პირებმა დატოვეს თანამდებობა, ვინ იდგა ამ ყველაფრის უკან, ვინ აფარებდა ხელს ამ ადამიანებს, რომლებიც 2012 წლის შემდეგ შინაგან საქმეთა სამინისტროს სისტემაში მუშაობდნენ. ხელისუფლება ამ საქმის გახსნით თავიდან ვერ აირიდებს იმ პასუხისმგებლობას, რომელიც მას ეკისრება იური ვაზაგაშვილის მკვლელობის საქმის გახსნისგან, - აღნიშნა პეტრიაშვილმა.
შეგახსენებთ, რომ პროკურატურამ 11 ყოფილი ძალოვანი მაღალჩინოსანი დააკავა და ზურაბ ვაზაგაშვილის მკვლელობის საქმე გახსნილად გამოაცხადა. საპარლამენტო ოპოზიციამ აღნიშნული დაკავებები პოლიტიკურ დევნად შეაფასა.