ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი ყოფილი პრემიერის ბიძინა ივანიშვილის განცხადებას არასამთავრობო სექტორთან დაკავშირებით კვლევის ჩატარების თაობაზე ეხმიანება და აცხადებს, რომ ის პრობლემას ვერ ხედავს თუ ერთი არასამთავრობო ორგანიზაცია გარკვეულ ანალიზს გააკეთებს სხვა არასამთავრობო ორგანიზაციების შესახებ.
,,თუ ერთი არასამთავრობო ორგანიზაცია გარკვეულ ანალიზს გააკეთებს სხვა არასამთავრობო ორგანიზაციების შესახებ ამაში ვერანაირ ზეწოლას ვერ ვხედავ, ისე როგორც მათაც შეუძლიათ ისეთივე ანალიზი გააკეთონ, თუ მათ ინტერესებში ეს შევა. ასე რომ ამ შემთხვევაში ზეწოლა არაფერ შუაშია", _განამარტა სუბარმა მთავრობის სხდომის შემდეგ.
ყოფილი პრემიერის ბიძინა ივანიშვილის განცხადებით, იგი არასამთავრობო ორგანიზაციებზე კვლევის ჩატარებას გეგმავს, რადგან ამ მიმართულებით ბევრი კითხვა არსებობს.
,,არასამთავრობოებზე ცალკე კვლევას ვაკეთებთ, მთავრობაზე დიდი არასამთავრობოები რომ არიან, მათზე, უფრო სწორად პიროვნებებზე - ლომჯარიაზე, გიგაურზე, კოჟორიძეზე. ჩვენ საინტერესო კვლევას დავდებთ მათზე. ძალიან ბევრი კითხვა გვაქვს. თვითონ მათზე გვაქვს კითხვები, რამდენადაც ტაბუ დაადეს რაღაც საკითხებს - არასამთავრობოებს ვერ შეეხებოდით, ასევე ცდილობდნენ, რომ პრეზიდენტის ინსტიტუტი არ გაგვეკრიტიკებინა", - განაცხადა ივანიშვილმა.
