თავდაცვის მინისტრი მინდია ჯანელიძე მთავრობის სხდომის დასრულების შემდეგ ევროსაბჭოს გადაწყვეტილებას რუსეთისთვის აპრილამდე ხმის უფლების შეჩერების საკითხს გამოეხმაურა და აღნიშნა, რომ აგრესიული პოლიტიკის კურსი კვლავ გრძელდება რუსეთის ფედერაციის მხრიდან.
,, რუსეთი განაგრძობს თავის აგრესიულ პოლიტიკას, როგორც უკრაინის, ისე საქართველოს მიმართულებით. თქვენ იცით, რომ ე.წ. ხელშეკრულება დაიდო აფხაზეთსა და რუსეთს შორის და ანალოგიური ხელშეკრულების დადება იგეგმება სამხრეთ ოსეთთანაც. შესაბამისად, აგრესიული პოლიტიკის კურსი გრძელდება რუსეთის ფედერაციის მხრიდან", - აღნიშნა ჯანელიძემ.
160 მომხრე და 42 წინააღმდეგი. ევროსაბჭომ რუსეთის სანქციები ძალაში დატოვა და აპრილამდე ხმის უფლება შეუჩერა.რუსულ მხარეს ასევე დაეკისრა ვალდებულება, უახლოეს 24- საათში გაათავისუფლოს პოლიტპატიმარი, უკრაინელი მფრინავი ნადეჟდა სავჩენკო.
საპარლამენტო ასამბლეის გადაწყვეტილებას არაადეკვატურად აფასებს რუსეთის დელეგაცია, რომელიც ევროსაბჭოს საპასუხოდ აპირებს 2015 წლის ბოლომდე ორგანიზაციის სხდომებში მონაწილეობა არ მიიღოს.
უკრაინის დელეგაციის შეფასებით კი, საპარალენტო ასამბლეის გადაწყვეტილება რუსეთისთვის ყვითელი ბარათია და ის წითელსაც მიიღებს, თუ მეზობელ ქვეყნებთან პოლიტიკას არ შეცვლის.
სანქციების ძალაში დატოვებას მიესალმებიან ქართული დელეეგაციის წევრებიც.
იმ მიზეზთა ჩამონათვალში კი, რის გამოც რუსეთს სანქციები დაეკისრა, უკრაინასთან ერთად საქართველოც მოხვდა.
