შერიგებისა და სამოქალაქო თანასწორობის საკითხებში სახელმწიფო მინისტრის, პაატა ზაქარეიშვილის განცხადებით იმ შემთხვევაში თუ დე ფაქტო აფხაზეთის შემდეგ ე.წ. ხელშეკრულება რუსეთსა და ცხინვალს შორისაც გაფორმდება იგი მსოფლიოს მიერ აღქმული იქნება, როგორც არარსებული დოკუმენტი.
,, ჯერჯერობით საუბარია მხოლოდ ცხინვალის მხრიდან, თანაც ჯერჯერობით, ვარაუდი. თუმცა არაა გამორიცხული ეს ნამდვილად განხორციელდეს. ,,მოკავშირეობისა და სტრატეგიული პარტნიორობის შესახებ" ე.წ. ხელშეკრულება ცხინვალის რეგიონთანაც გაფორმდება, ეს მსოფლიოს მიერ აღქმული იქნება, როგორც არარსებული დოკუმენტი. ეს იქნება უკანონო", - განაცხადა ზაქარეიშვილმა მთავრობის სხდომის შემდეგ.
სამხრეთ ოსეთმა რუსეთთან მოკავშირეობისა და სტრატეგიული პარტნიორობის ხელშეკრულება შესაძლოა მომავალი წლის დასაწყისში გააფორმოს. ამის შესახებ, დეფაქტო რესპუბლიკის პარლამენტის სპიკერმა ანატოლი ბიბილოვმა განაცხადა. მისივე თქმით, დოკუმენტი უფრო მეტად ინტეგრაციული იქნება, ვიდრე რუსულ-აფხაზური ხელშეკრულება. "ჩვენ დაინტერესებულნი ვართ მაქსიმალური ინტეგრაციით არამხოლოდ უსაფრთხოების, არამედ სოციალურ საკითხებშიც, რადგანაც შეთანხმების რეალიზება სამხრეთ ოსეთის მცხოვრებლების სოციალურ პირობებზე, ხელფასებსა და პენსიებზეც უნდა აისახოს. ასევე, მთლიანად უნდა მოგვარდეს საბაჟო საკითხები,"-განაცხადა ბიბილოვმა.