თუ აბაშიძე-კარასინის ამ სულმოკლე ფორმატს გავარძელებთ, მაშინ დიდი შანსია, რომ მთელმა მსოფლიომ ხელები დაიბანოს ამ პრობლემაზე, - ასე გამოეხმაურა კულტურის ექსმინისტრი ნიკა რურუა დღევანდელ პრესკონფერენციაზე, რუსეთის მიერ აფხაზეთის დე-ფაქტო რესპუბლიკასთან ე.წ. მოკავშირეობის და სტრატეგიული პარტნიორობის შეთანხმებას გაფორმებას.
მისი თქმით, რუსეთის აღნიშნული ნაბიჯი, საქართველოს ხელისუფლების მიერ რუსეთთან გამოცხადებული დათბობის პოლიტიკის შედეგია.
"მოკლევადიანი ბერკეტი არ არსებობს, არსებობს გრძელვადიანი დიპლომატიური ბერკეტი.
საქართველოს ხელისუფლებამ ორი წლის წინ გამოაცხადა რუსეთთან დათმობის პოლიტიკა, რამდენად ეფექტური იყო ეს პოლიტიკა ამ ხელშეკრულებამაც კარგად აჩვენა.
გრძელვადიან პოლიტიკით თუ პრინციპულად ვიმოქმედებთ გავიმარჯვებთ, თუ აბაშიძე-კარასინის ამ სულმოკლე ფორმატს გავაგრძელებთ, მაშინ დიდი შანსია, რომ მთელმა მსოფლიომ ხელები დაიბანოს ამ პრობლემაზე. თავისუფალი სამყაროს რადარებიდან საქართველო ჩამოიხსნა, იმიტომ, რომ საქართველოს ხელისუფლებამ საერთაშორისო თანამეგობრობას განუცხადა, რომ რუსეთთან ურთიერთობას მათ გარეშე დაალაგებს. კარგია, რომ ახლა ეს რიტორიკა შეიცვალა. ხელისუფლება უნდა მიხვდეს, რომ აბაშიძე-კარასინის ჩიხში შევედით", - განაცხადა ნიკა რურუამ.
მისივე თქმით, ეს ე.წ. ხელშეკრულება უკანონოა, რადგან რეგიონში, სადაც ეთნიკური წმენდა განხორციელდა, არ შეიძლება რაიმე ხელშეკრულება გაფორმდეს, რასაც ერთმნიშვნელოვნად აღინიშნავს თავისუფალი სამყარო.
