უფლებადამცველი ნანა კაკაბაძე ციხის ბადრაგის მხრიდან პატიმრების ცემის ფაქტზე საუბრობს და ,,ჯი-ეიჩ-ენთან" საუბარში მსჯავრდებულების ვინაობასაც ასაჯაროვებს.
,,ძმები გ. ს და გ. ს და ნ. თ. 4 ნოემბერს ციხის ბადრაგმა სცემეს", _განაცხადა ,,ჯი-ეიჩ-ენთან" საუბარში კაკაბაძემ.
აღსანიშნავია ისიც, რომ სახალხო დამცველმა უჩა ნანუაშვილმა 18 ნოემბერს წინადადებით მიმართა მთავარ პროკურორს, დაიწყოს გამოძიება საბადრაგო სამმართველოს თანამშრომლების მხრიდან ქუთაისის #2 დაწესებულებში განთავსებულ მსჯავრდებულთა მიმართ განხორცილებული შესაძლო დანაშაულის შესწავლის მიზნით.
2014 წლის 7 ნოემბერს სახალხო დამცველის რწმუნებულებმა ქუთაისის #2 სასჯელაღსრულების დაწესებულებაში მოინახულეს მსჯავრდებულები გ.ს-ს, გ.ს-ს და ნ.თ-ს. მსჯავრდებულთა განცხადებით, მიმდინარე წლის 4 ნოემბერს მათი ქუთაისის სააპელაციო სასამართლოში ტრანსპორტირების დროს ბადრაგის თანამშრომლები პროვოკაციულად იქცეოდნენ. სასამართლოში მიყვანის შემდგომ, კი სამივე მსჯავრდებული დროებითი მოთავსების იზოლატორის სხვადასხვა საკანში მოათავსეს, რამაც მსჯავრდებულთა პროტესტი გამოიწვია. პროტესტს ერთ-ერთ ბადრაგთან სიტყვიერი შეკამათება მოჰყვა, რაც ურთიერთ შეურაცხყოფაში გადაიზარდა. გაბრაზებული ბადრაგი გავიდა რამდენიმე წუთით და გ.ს-ს საკანთან იარაღით დაბრუნდა. სამივე მსჯავრდებული ცალსახად აცხადებს, რომ ბადრაგმა გ.ს-ს საკნის კარის სარკმელიდან იარაღი დაუმიზნა და მოკვლით დაემუქრა.
სასამართლო პროცესის დასრულების შემდეგ, მათ იზოლატორის შენობაში დაახლოებით საბადრაგო სამმართველოს ოცამდე თანამშრომელმა სამივე მსჯავრდებული სასამართლოს შენობაში ცემეს. შემდეგ ისინი კვლავ ქუთაისის #2 დაწესებულებაში დააბრუნეს.
მსჯავრდებულებს სახალხო დამცველის რწმუნებულებთან შეხვედრის დროს, სხეულზე მრავლობითი დაზიანებები აღენიშნებოდათ. დაზიანებების არსებობას ადასტურებს ასევე დაწესებულების ბრალდებულთა/მსჯავრდებულთა ტრავმების აღრიცხვის ჟურნალის ჩანაწერები და 4 ნოემბერს სად-ის #2 დაწესებულების მორიგე ექიმის მიერ შედგენილი შემოსულ მსჯავრდებულთა გარეგნული დათვალიერების აქტები.
