უზენაესი სასამართლოს თავმჯდომარე კოტე კუბლაშვილი ,,თავისუფალი დემოკრატების" წევრისა და ყოფილი სახელმწიფო მინისტრის ევროატლანტიკურ სტრუქტურებში ინტეგრაციის საკითხებში განცხადებას ეხმიანება და განმარტავს, რომ მისთვის უცნობია კონკრეტულად რას გულისხმობდა პეტრიაშვილი ძალადობაში.
,,მე, არ ვიცი, ვერ გეტყვით, ეს ალექსი პეტრიაშვილს უნდა ჰკითხოთ, თუ რას გულისხმობდა. მე მასთან საერთოდ არასდროს მქონია ურთიერთობა გარდა იმისა, რომ საერთაშორისო კონფერენციაზე შევხვდი ერთხელ. ეს იყო და ეს. ასე, რომ რა იდო მის სიტყვებში მან უკეთ იცის. დააზუსტებინეთ და შემდეგ იქნებ მეც გავიხსენო", - განაცხადა კონსტანტინე კუბლაშვილმა.
ბოლოს და ბოლოს გაიგებს საერთაშორისო თანამეგობრობა, ვინ იძალადა უზენაესი სასამართლოს თავმჯდომარეზე, - ამის შესახებ, სოციალურ ქსელ "ფეისბუქში" ყოფილმა სახელმწიფო მინისტრმა ევროინტეგრაციის საკითხებში ალექსი პეტრიაშვილმა 10 ნოემბერს დაწერა.
"მიხეილ სააკაშვილი ამბობდა თავისუფალი დემოკრატები რუს ოლიგარქს ლობირებენ და კრემლის პროექტის ნაწილი არიანო, ირაკლი ღარიბაშვილი ამბობს - ნაციონალებს ლობირებენო! ჩვენ, თავისუფალი დემოკრატები ვლობირებდით საქართველოს, საქართველოს ხალხის ევროპულ და ევროატლანტიკურ არჩევანს! ამას ნამდვილად ვადასტურებთ! ამას ჩვენი საქმეებიც ადასტურებენ! აი თქვენ კი ლობირებდით ზურა ადეიშვილს და მეგისი ქარდავას, გიორგი ბადაშვილს და ირაკლი შოთაძეს და მათ საგმირო საქმეებს შესაბამისად თქვენ თქვენი მმართველობის პერიოდში! ეგრე გააგრძელეთ ბატონო პრემიერ მინისტრო და ბოლოსდაბოლოს გაიგებს ალბათ საერთაშორისო თანამეგობრობა, ვინ იძალადა უზენაესი სასამართლოს თავმჯდომარეზე", - წერდა პეტრიაშვილი.