ასოცირების საბჭოს პირველ სხდომაზე ჩვენ კიდევ უფრო მაღალ დონეზე ავიყვანეთ პოლიტიკური დიალოგი და საქართველო-ევროკავშირის ასოცირების ახალი ინსტიტუციური ჩარჩო ჩამოვაყალიბეთ, - ამის შესახებ საქართველოს პრემიერ-მინისტრმა ირაკლი ღარიბაშვილმა სხდომის შემდეგ, საგარეო საქმეთა და უსაფრთხოების პოლიტიკის საკითხებში ევროკავშირის უმაღლეს წარმომადგენელ ფედერიკა მოგერინისთან ერთობლივ პრესკონფერენციაზე განაცხადა.
პრემიერის შეფასებით, ასოცირების საბჭოს პირველი სხდომა, საქართველოს ევროპისაკენ მიმავალ გზაზე კიდევ ერთი ისტორიული მნიშვნელობის მოვლენაა.
ღარიბაშვილმა ხაზგასმით განაცხადა, რომ საქართველოს ევროპული და ევროატლანტიკური კურსი ეროვნულ იდეას და ცივილიზაციის სასარგებლოდ გაკეთებულ არჩევანს წარმოადგენს და ის შეუქცევადია.
„ჩემი ამბიციაა, ვაქციო ჩემი ქვეყანა რეგიონში წარმატების მაგალითად, რისთვისაც გამოყენებული იქნება ევროინტეგრაციის პროცესის ტრანსფორმაციული ძალა. ამ მიზნის მისაღწევად კი ჩვენ განვიხილავთ ასოცირების ხელშეკრულებას, როგორც ევროპული, სტაბილური და ქმედითი პლურალისტური დემოკრატიის საფუძველს, რომლის თანმხლებია კონტროლისა და ბალანსის ეფექტური მექანიზმები და ძლიერი დემოკრატიული ინსტიტუტები", - განაცხადა პრემიერმა.
საქართველოს მთავრობის მეთაურმა ღრმა და ყოვლისმომცველი თავისუფალი სავაჭრო ზონისა და ვიზების ლიბერალიზაციის მნიშვნელობაზეც ისაუბრა.
„აღმოსავლეთის პარტნიორობის ფარგლებში მიღწეული არსებითი წინსვლის გარდა, სახეზეა რეგიონში არსებულ გამოწვევებზე სათანადო პასუხის გაცემის მზარდი საჭიროება, რაც ჩვენი საერთო მიზნების მიღწევას ემსახურება. უკიდურესად მნიშვნელოვანია, მტკიცედ იყოს დაცული სუვერენიტეტისა და ჩაურევლობის ძირეული პრინციპები და თითოეული ქვეყნის უფლება, თავად განსაზღვროს და წარმართოს თავისი საგარეო პოლიტიკა", - აღნიშნა ირაკლი ღარიბაშვილმა.
საგარეო საქმეთა და უსაფრთხოების პოლიტიკის საკითხებში ევროკავშირის უმაღლეს წარმომადგენელ ფედერიკა მოგერინიმ კმაყოფილება გამოთქვა საქართველოს მიერ ვიზის ლიბერალიზაციის სამოქმედო გეგმის პირველი ფაზის წარმატებით განხორციელებასთან დაკავშირებით და ხაზგასმით აღნიშნა საქართველოს წვლილი ევროკავშირის საერთაშორისო მისიებში.
ფედერიკა მოგერინიმ დემოკრატიული განვითარების მიმართულებით პროგრესი უწოდა 2012 წლის საპარლამენტო და 2013 წლის საპრეზიდენტო არჩევნებს. ევროკავშირის უმაღლესმა წარმომადგენელმა ასევე მოიწონა ადამიანის უფლებების სამოქმედო გეგმისა და ანტიდისკრიმინაციული კანონის დამტკიცება და ადამიანის უფლებათა დაცვის მიმართულებით საქართველოს მთავრობის მიერ გადადგმული ნაბიჯები.
„ასევე განვიხილეთ დე-ფაქტო ადმინისტრაციულ სასაზღვრო ზოლზე დაწესებული შეზღუდვები. ორმხრივი შეშფოთების საგანია ის შეთანხმება, რომელიც რუსეთსა და აფხაზეთს შორის განიხილება. ეს ეწინააღმდეგება საქართველოს ტერიტორიულ მთლიანობას და არ შეუწყობს ხელს რეგიონში ვითარების დეესკალაციას. ევროკავშირი მხარს უჭერს საქართველოს ტერიტორიულ მთლიანობას და კვლავაც პროაქტიურად დასვამს ამ საკითხს რუსეთის წინაშე", - განაცხადა ფედერიკა მოგერინიმ.