ბოლოდროინდელმა კვლევებმა და გამოხმაურებამ აჩვენა, რომ მოქალაქეთა ნდობა ეროვნული ბანკის მიმართ საკმოდ მაღალია. ეს ნდობა, განპირობებულია იმ ფაქტორითაც, რომ ეროვნული ბანკი მუდმივად ინარჩუნებს გამჭვირვალობის პრინციპს. საზოგადოება ინფორმირებულია საქართველოს ეროვნული ბანკის აქტივობებისა და რეფორმების შესახებ.

სატელეფონო საინფორმაციო მომსახურების ამოქმედებით მარტივდება ინფორმაციის მიღების პროცესი - მოქალაქე რეკავს ტელეფონის ნომერზე 406 406 სვამს შეკითხვას და უმეტეს შემთხვევაში იღებს დაუყოვნებლივ პასუხს. ხოლო თუ თემა საჭიროებს დამუშავებას, ანალიზს, მას მოგვიანებით ოპერატორი თავად უკავშირდება და აწვდის მისთვის სასურველ ინფორმაციას.

„ჩვენ კარგად გვესმის, რომ ყველა ახალი ინსტრუმენტი თუ მეთოდოლოგია, რომელსაც ეროვნული ბანკი ნერგავს, საბოლოოდ მოქალაქეთა ყოველდღიურ ცხოვრებაზე აისახება. ამდენად, ჩვენთვის მნიშვნელოვანია ვიცოდეთ, როგორ ხორციელდება ჩვენს მიერ შეთავაზებული რეფორმები, სადაა ნაკლოვანებები და რომელი ღონისძიება აღმოჩნდა წარმატებული. საინფორმაციო სატელეფონო სერვისი რომელიც ჩვენ დავნერგეთ არის პირველი ეტაპი მოქალაქეებთან ინტერაქციული ურთიერთობის აწყობის. კონკრეტული მაგალითი მინდა მოგიყვანოთ, ჩვენ გავაუქმეთ უამრავი რეგულაცია, რომლემაც გაამარტივა ურთიერთობა ფიზიკურ პირებსა და ბანკებს შორის, თუმცა მიუხედავად ამისა, ხშირია ფაქტები, როდესაც მარტივ ოპერაციაზე, ისეთზე მაგალითად როგორიცაა მცირე ოდენობის ვალუტის კონვერტაცია, კომუნალური გადასახადების გადახდა, ითხოვენ მაგალითად პირადობის მოწმობას და სხვა საიდენტიფიკაციო დოკუმენტებს. ამიტომ ვფიქრობთ, რომ ასეთი ტიპის მომსახურება იქნება ძალიან ეფექტური როგორც მოსახლეობისათვის, ასევე ბანკებისა და საფინანსო სექტორის სხვა წარმომადგენლებისათვის", - განაცხადა ეროვნული ბანკის პრეზიდენტმა გიორგი ქადაგიძემ ახალი სატელეფონო საინფორმაციო მომსახურების პრეზენტაციაზე.