ოს სეპარატისტთა ლიდერი ედუარდ კოკოითის მოთხოვნას თრუსოს ხეობის ე.წ სამხრეთ ოსეთისათვის დაბრუნების შესახებ თბილისში კრემლის მიერ ისტორიის გაყალბების მორიგ მცდელობად აფასებენ.
ქართველი კანონმდებლები აცხადებენ, რომ კოკოითი რუსეთის უშიშროების ფედერალური სამსახურის გეგმას ახმოვანებს. რუსეთი კი ცდილობს საქართველოს კიდეც ერთი ისტორიული ნაწილი მოგლიჯოს.
"ეს არ არის დამოუკიდებელი ფიგურა და რეალურად მის უკან დგას რუსეთი. ადრე თუ გვიან რუსეთი ამის გამო სერიოზული პრობლემის წინაშე დადგება და ამის ნიშნები უკვე არსებობს, მაგრამ ჯერ ჯერობით ასეთი პროვოკაციული განცხადებები და ზოგჯერ ნაბიჯებიც მოსალოდნელია. ყოველივე კი იმიტომ ხდება, რომ რუსეთი ვერ იტანს საქართველოს დამოუკიდებლობას და ცდილობს მაქსიმალური პროვოცირებებით თავისი მიზნების მიღწევას", _ აცხადებს უმრავლესობის ერთ-ერთი ლიდერი დავით დარჩიაშვილი.
ქრისტიან დემოკრატების წევრი ნიკა ლალიაშვილი კი კოკოითის მიერ გაკეთებულ განცხადებას, რუსეთის "ეფ-ეს-ბეს" ხელმძღვანელის ნიკოლაი პატრუშევის მიერ რამდენიმე დღის წინ გაკეთებულ განცხადებას უკავშირებს.
"ის აგრძელებს ზუსტად იმ კურსს რასაც აქამდე მას "ეფ-ეს-ბე" კარნახობდა. იგი დღეს ოფიციალურად აცხადებს, რომ თრუსოს ხეობა არის ე.წ. სამხრეთ ოსეთის ტერიტორია. ვფიქრობ, რომ ეს განცხადება კონტექსტიდან ამოღებული არ არის და მიბმულია პატრუშევის განცხადებაზე ქართული კვალის შესახებ. საბოლოო ჯამში ვფიქრობთ, რომ ეს ყველაფერი გადაიზრდება ძალიან სერიოზულ პროვოკაციაში", _ აცხადებს ლალიაშვილი.