რაჭაში, ამბროლაურის რაიონის სოფელ ჭრებელოში გაჩენილი ხანძარი ამ დროისთვის ლოკალიზებულია.
როგორც "ჯი-ეიჩ-ენს" რაიონის გამგებელმა კახა ფანჯანაძემ განუცხადა, ცეცხლი ერთ-ერთი ადგილობრივი მცხოვრების ნაკვეთში, დაუდევრობის გამო გაჩნდა.
"საგაზაფხულო სამუშაოების ჩატარების შემდეგ, ერთ-ერთმა ადგილობრივმა მცხოვრებმა დასაწვავად შეგროვილ ფოთლებს ცეცხლი წაუკიდა, თუმცა ის ძლიერი ქარის გამო მიმდებარე ტერიტორიას მოედო. ამან ხანძრის რამდენიმე წერტილოვანი კერა წარმოშვა, რაც ადგილობრივი მოსახლეობისა და შესაბამისი სამსახურების წარმომადგენლების ერთობლივი ძალისხმევით ამ დროისთვის მთლიანად ლოკალიზებულია", - განუცხადა ფარჯანაძემ "ჯი-ეიჩ-ენს".
მისივე განმარტებით, იმისთვის, რომ ხანძარი ჭრებელოს ტყის მასივს არ მოსდებოდა, 10-15 კაციანი 7 ჯგუფი იყო შექმნილი და "ცეცხლის სწრაფად ლიკვიდაციისთვის ყველაფერი გაკეთდა".
"ახლა რაჭაში ნისლია. როგორც კი ის გაიფანტება, ზუსტად გვეცოდინება რა ფართობის ტერიტორია დაიწვა, თუმცა წინასწარი ინფორმაციით, ის ერთ ჰექტარსაც არ აღწევს", - განმარტა ამბროლაურის რაიონის გამგებელმა.
სოფელ ჭრებელოში ხანძარი გუშინ საღამოს გაჩნდა.
